Midwife namatay kay nasobrahan sa trabaho?

CEBU, Philippines — Dili hulipan ni Cebu City Mayor Raymond Alvin Garcia si Dr. Daisy Villa isip pangulo sa City Health Department apan uyon siya nga ipaubos og imbestigasyon ang maong departamento human nga adunay midwife ang gikatahong namatay tungod matud pa nasobraan og trabaho.

“Ang death sa midwife, we don’t know for certain what caused of death… there might be underlying reasons nganong namatay siya… we have to look for a proper medical explanation kay she might have had pre-existing conditions,” pagpasabot pa ni Garcia.  Base sa login records sa maong midwife, kapin 56 ka oras kining nitrabaho sa sulod sa usa ka semana.  Ang kabanay sa midwife miingon nga stressed ug hago kaayo kini sa trabaho kay lahus-lahos ang duty niini sa ikaduhang semana sa Marso karong tuiga.

Nipadayag sab og kabalaka si Konsehal Mary Ann de los Santos atol sa iyang privilege speech sa regular session nga ang operasyon sa CHD giingong dili “employee-friendly.”

Siya miingon nga ang standard working hours basi sa Magna Carta for Public Health Workers kinahanglang walo ra ka oras kada adlaw o 40 ka oras kada semana.

Mao nga nanawagan ang konseho ngadto sa Cebu City Human Resource Development Office nga makig-alayon sa City Legal Office aron sa pagpahigayon og imbestigasyon sa giingong “excessive working conditions” nga nahitabo sa City Health Department.

Gani, daghan sab siya nga nadawat nga mga reklamo gikan sa mga health workers nga matud pa dili na makiangayon ang oras sa ilang pag duty sa CHD.

Mismo si Garcia niangkon nga nakadawat siya ani nga reklamo apan dili pa siya makaaksyon paglahugay tungod sa election ban. (BANAT NEWS)