RHW sa DSWD-7 napiling best center sa PRAISE Awards

CEBU, Philippines — Ang Regional Haven for Women (RHW), usa sa mga sentro sa Department of Social Welfare and Development (DSWD) Region 7, maoy napiling kampiyon sa Best Center category sa 2024 National Program on Awards and Incentives for Service Excellence (PRAISE) Awards, nga gipahigayon sa DSWD sa Malate, Manila. Ang RHW, usa sa lima ka mga sentro nga gidumala sa DSWD sa Central Visayas, nailhan nga naghatag og mga programa sa rehabilitasyon ug mga serbisyo sa pagpanalipod alang sa kababayen-an nga mga biktima sa pagpangabuso.

Ang maong sentro bag-o lang nakakuha og pasidungog gikan sa PRAISE Awards, usa ka inisyatibo sa gobyerno sa Pilipinas nga nag-ila sa mga empleyado sa ilang produktibo, mamugnaon, bag-o, ug etikal nga kontribusyon sa kahusayan sa serbisyo.

Ang DSWD-7 nagkanayon nga aron matawag nga Best Center, ang usa ka center ug residential care facility kinahanglang magpakita og talagsaong paningkamot sa pag-ayo, rehabilitasyon, ug paghatag og katakus sa mga kliyente niini.

Si Ananisa F. Aviso, ang kanhi pangulo sa RHW center ug karon ang sector focal person for women, niingon nga ang ilang pakigtambayayong sa nagkalain-laing organisasyon ug opisina, sulod ug gawas sa DSWD, maoy rason nga nakab-ot nila kini.

Samtang, si Regional Director Shalaine Marie S. Lucero nipadayag sa pag-ila sa RHW maoy usa ka testamento sa ilang estratehikong pakigtambayayong, innovative nga mga programa, mga paningkamot sa digitalization, ug mga inisyatibo nga makapauswag sa serbisyo ug suporta sa komunidad.

Karong tuiga, ang sentro magsaulog sa ika-32 nga anibersaryo, nga nagtutok sa paghatag og gahum sa kababayen-an, pagpasiugda sa pagpanalipod sa kababayen-an gikan sa tanang matang sa pag-abuso, ug pagpalig-on sa mga mekanismo niini sa pagtaho sa Violence Against Women and Children (VAWC).

Misaad kini nga palig-onon ang ilang tingog, aron makita sa tanan nga adunay luwas nga dangpanan ang mga babaye nga anaa sa krisis ug hunongon ang VAWC.