Unity Walk para sa malinawong eleksyon

CEBU, Philippines — Gipahigayon sa Dakbayan sa Sugbo ang Unity Walk, Inter-Faith Rally, Candidates Forum, and Peace Covenant Signing for Secure Accurate Free/Fair Elections (SAFE) 2025 nga nagdugod sa Plaza Sugbo paingon sa Plaza Independencia kagahapon, Marso 21, 2025.

Gitambungan kini sa pipila ka mga ahensya sa gobyerno sa Armed Forces of the Philippines, Philippine National Police, Department of Interior and Local Government, Bureau of Fire Protection, Bureau of Jail Management and Penology, Phillipine Coast Guard, Department of Education, Joint Task Group ug uban pa nga mosalmot sa politikanhong kalihukan.

Lakip sa nitambong ang mga kandidato alang sa piniliay karong Mayo 2025 kun diin ana ang mayoralty aspirants nga si Konsehal Nestor Archival ug kanhi Commissioner Yogi Ruiz ug ang independent candidate nga si Julieto Co.

Wala mipatim-aw si Mayor Raymond Alvin Garcia ug kanhi mayor Michael Rama nga pareho sab nga nagtinguha nga mapiling mayor sa piniliay.

Gawas sa mga nilansar pagkamayor, nitambong si Bise Mayor Donaldo Hontiveros ug ang kaatbang niini nga si kanhi mayor Tommy Osmeña.

Mitambong ang mga molansar pagka-kongresista nga sila si ABC President Franklyn Ong, Konsehal Mary Ann Delos Santos, ug Congresswoman Cutie del Mar.

Ang Unity Walk gipasiugdahan kini sa COMELEC-7 aron nga mahimong hapsay ang umaabot piniliay pinaagi sa malambuon nga sistema.

Si COMELEC-7 Director Francisco Pobe nagkanayon nga tukma ra gyud ang pagpapahigayon niini sa dili pa magsugod ang kampanya aron mapakita sa katawhan nga  para sa kaayuhan ug kalambuan alang sa dakbayan ang ilang paglansar.

Sugdan karong Marso 28 ang kampanya ug magsugod na sab ang COMELEC sa pagpanangtang sa mga campaign materials nga nakaposte sa dili tukmang lugar.   IBM  BANAT NEWS