Remulla nimando sa PRO7 pagpuhag sa private armed groups
CEBU, Philippines — Nibisita sa Sugbo kagahapon, Miyerkules, Pebrero 5, 2025 si Department of Interior and Local Government Secretary Juanito Victor Remulla.
Usa sa mga gibisita niini mao ang Police Regional Office(PRO)-7 diin gisugat siya ni Police Brigadier General Redrico Maranan, Regional Director sa PRO-7.
Gipresentar ni Secretary Remulla ug Police Brigadier General ang 1,461 ka mga armas ug 25 ka explosives nga na-recover, gi-surrender ug nakompiskar sa gihimong checkpoints, police operations, buy-busts ug pagpatuman sa arrest warrants gikan sa Oktubre 1, 2024 hangtud na sa Pebrero 3, 2025.
Sa 1,461 ka mga armas 121 niini boluntaryong gi-surrender ug 1,340 ang nasakmit.
Kabahin kini sa ilang mas gihingusgan nga kampanya batok loose firearms ilabi na karon nga nagkaduol na ang National ug Local Elections nga mahitabo karong May 2025.
Aron masiguro nga hapsay ug malinawon nga mapahigayon ang umaabot nga eleksyon si Secretary Remulla sa iyang bahin mimando sa kapolisan sa PRO-7 sa pagpuhag sa private armed groups.
Hinoon, dinhi sa Central Visayas usa lang ka private armed group ang na-monitor sa PRO-7 ug naa kini sa Negros Oriental.
Gawas niini, gihimug-atan sab ni Secretary Remulla nga wala'y dapigan ug dili motrabaho isip private army sa mga politiko ang kapolisan.
"They have to stay neutral, they have to stay professional", sigon ni Secretary Remulla.
Samtang si Police Colonel Arvie Aserre Paraon-Bueno, tigpamaba ni PRO-7 Regional Director Brigadier General Redrico Maranan mihulagway nga dako og epekto sa peace and order sa Central Visayas ang pagsakmit ug pag-surrender sa mga armas nga wala'y lisensya ug dili rehistrado. (BANAT NEWS)
- Latest
