DA ni-ban sa pag-import sa domestic ug wild birds sa New Zealand

CEBU, Philippines — Temporaryong gi-ban sa Department of Agriculture (DA) ang pag-import sa mga domestic ug wild birds gikan sa New Zealand tungod sa gikatahong outbreak sa avian influenza sa maong nasud.

Subay sa memorandum order No. 01, Si Agriculture Secretary Francisco Tiu Laurel, Jr. nikompirma nga ang tests nga gihimo sa New Zealand National Animal Health Laboratory sa domestic birds gikan sa East Otago, Waitaki ug Canterbury kaniadtong ulahing bahin sa buwan sa Nobiyembre niaging tuig nagpositibo sa H7N6 strain sa high pathogenicity avian influenza.

Ang outbreak opisyal nga gitaho sa mga otoridad sa New Zealand sa World Organization for Animal Health.

Matud ni Laurel nga ang pag-ban sa pag-import sa mga domestic ug wild bird ingon man ang mga itlog, day-old chicks, semen ug poultry meat mahinungdanon sa pagpugong sa pagsulod sa high pathogenic avian influenza sa Pilipinas pagpanalipod sa panglawas sa lokal nga populasyon sa manok.

Ang ahensiya nagkanayon nga ang poultry industry lakip ang egg production usa ka multi-billion-peso sector nga nagsuporta sa mahinungdanong investments, naghatag og daghang trabaho ug adunay papel nga gihuptan sa pagsiguro sa food security sa atong nasud.

Isip kabahin sa ban, si Laurel nimando sa pagsuspenso dayon sa processing, evaluation ug issuance sa sanitary ug phytosanitary import clearances alang niining mga items gikan sa mga nahisgutang lugar sa New Zealand. Bisan pa niini, ang mga kargamento nga na-transit, gi-load, o gidawat sa mga pantalan sa wala pa ang opisyal nga pahibalo sa banning tugotan nga mosulod basta ang mga produkto giihaw o gihimo sa wala pa ang Nobiyembre 9, 2024.

Ang quarantine authorities gimandoan na nga kompiskahon ang lain-laing poultry commodities nga nahisgutan sa subay sa memorandum order.  BDB BANAT NEWS