Kaso vs taga OPPRA gibasura

CEBU, Philippines — Gibasura sa korte ang kasong sibil nga “unlawful detainer” nga gisang-at sa Probinsya sa Sugbo batok sa pipila ka okupante sa Old Railway Residents Association, Inc., (OPPRA) sa dakbayan sa Sugbo.

Sa 18 ka pahina nga desisyon ni Presiding Judge Vivien Leigh Santiago-Lumangtad sa Municipal Trial Court in Cities (MTCC) Branch 11 Cebu City, gibasura sa korte ang maong reklamo tungod sa “lack of cause of action” o kakulang sa ebidensya pagpamatuod sa pasangil.

Ang Probinsya sa Sugbo nga girepresentahan ni Gobernador Gwendolyn Garcia, mipasaka sa maong reklamo sa korte niadtong Abril 25, 2024, human nga nagdumili ang mga okupante sa OPPRA Village nga mohawa sa luna nga gipanag-iya sa Probinsya sa Sugbo.

Ang Kapitolyo maoy tag-iya sa luna sa OPPRA Village nga moabot sa 160, 196 metro kwadrado sa onse (11) ka parcel lots  nga gibalayan sa pipila ka mga okupante nga maoy “defendants” sa kaso nga gisang-at sa kapitolyo.

Ang maong luna adunay kasabotan o Sales Agreement tali sa okupante sa OPPRA ug Probinsya sa Sugbo niadtong  Hunyo 7, 1971 diin ang baligya kaniadto sa luna miabot pa sa P10 matag metro kwadrado,  apan kinahanglan bayran ang 10% nga downpayment ug ang balanse bayran sulod sa 10 ka tuig.

Apan sulod sa pipila ka tuig, padayon nga gipuy-an sa mga okupante hangtod niabot na sa mga heirs o predecessors niini ang maong mga luna bisan wala matuman ang obligasyon nga bayranan ngadto sa Kapitolyo.

Upat ka dekada ang milabay, ang Sangguniang Panlalawigan mipagawas og resolusyon niadtong Abril 16, 2012 aron i-terminate ang maong kasabotan o kadtong sales agreement tungod sa kapakyas sa mga okupante nga mosubay sa kondisyon sa kasabotan ug sa pagbayad sa ilang obligasyon.

Laing tuig ang milabay, nagpadayon ang mga okupante sa pagpuyo sa maong lugar hangtod nga midesisyon ang kapitolyo nga bakwion ang maong luna nga nahimutang ra sa dakbayan sa Sugbo, alang sa mga konstituwente sa Probinsya sa Sugbo.

Ang kapitolyo, mi-offer nga ibaligya kini ngadto sa mga kasamtangang okupante sa luna pinaagi sa PAG-IBIG, ug nasabotan nga P11, 000 matag metro kwadrado ang presyo niini ug mamahimong bayran ubos sa housing loan sa PAG-IBIG sulod sa 30 ka tuig.

Apan ang mga okupante o “defendants” sa maong kaso, wala gihapon miproseso sa ilang loan application sa PAG-IBIG ug wala sab mi-comply sa mga rekisitos nga gikinahanglan.

Ang kapitolyo mipadala na pud og demand letter sa mga okupante aron bakantehan na ang luna, apan matod pa pipila lang niini ang midawat sa demand letter, ang uban wala.

Sa 249 ka mga defendants, siyam (9) ang mitubag sa complaint sa Probinsya ngadto sa korte.

Sa ruling sa korte, nagkanayon nga walay lalis nga ang Probinsya sa Sugbo gyud ang tag-iya sa maong mga luna kun diin aduna kini katungod kun unsaon niya kini paggamit.

Apan sumala sab sa korte “ownership by itself, does not grant the owner an unbridled authority to wrest possession from the lawful occupant.”

“Accordingly, it is incumbent upon the plaintiff to prove the acts of tolerance, for a bare allegation of tolerance will not suffice. In an action for unlawful detainer, the complainant must prove through preponderance of evidence that he/ she consented to the possession of the property through positive acts,” tipik sa desisyon ni Judge Lumangtad penetsahan Disyembre 4, 2024.

Matud sab sa korte kinahanglan nga adunay “supporting evidence on record” nga magpakita kun giunsa ug kanus-a ang mga respondents nisulod sa maong propedad ug kinsa ang mi-grant o mitugot kanila nga mogamit sa maong propedad.  Apan ang kapitolyo, pakyas sa pagpakita sa maong ebidensya.

“The plaintiff’s supposed acts of tolerance must have been present right from the start of the possession. Otherwise, if the possession was already unlawful at the outset, it would constitute an actioin for forcible entry, and the filing of one for unlawful detainer would be an improper remedy,” dugang basa sa desisyon.

Giklaro hinoon sa korte nga ang ruling niini wala magpasabot nga wala nay “recourse” o legal nga pamaagi nga mahimo ang kapitolyo.

Si Gobernador Garcia sa dihang gikuhaan sa Banat News og pamahayag nagkanayon nga  dili una siya mokomento hangtod wala pa niya mabasa ang tibuok nga detalye sa desisyon sa korte. — /IBM (BANAT NEWS)