Mga detention ponds planong palawman

CEBU, Philippines — Nanghinaot si Konsehal Jerry Guardo nga ma-aprubahan dayon ni Cebu City Mayor Raymond Alvin ang ilang mga plano sa pag-rehabilitate ug pagpaayo sa kasamtangang mga detention ponds sa dakbayan aron maminusan ang pagbaha gikan sa magamit nga pundo gikan sa Department of Public Work and Highways.

Sa pagpakighinabi ni Guardo sa The Freeman/Banat News, human sa ilang pagpahigayon og joint inspection kauban ang Task Force Gubat sa Baha, DWPH, Cebu City Planning and Development Office, Department of Engineering ug mga representante gikan USC, Maria Luisa, ug Family Park, nasuta nila nga ang mga detention ponds anaa nahimutang sa University of San Carlos-Talamban area, Maria Luisa Subdivision, ug Family Park.

Apan kasagaran niini wala na mapahimusli kay naghinayhinay na og katabunan og lapok.

“Ang importante, ma kuan ang detention didto kay karon man gud, one of the major causes of flooding downstream, is the run-off water coming from upstream,” esplikar pang Guardo.

Matud pa ni Guardo nga ilang ipresentar ang ilang mga plano sa pag-desilt ug pagpalawom sa maong mga detention ponds aron makatabang sa problema sa pagbaha sa syudad.

“In order to accommodate more volume of water, ginahanglan pud namo to sila paladman,” dugang pa ni Guardo.

Gibutyag sab ni Guardo nga adunay pundo ang DPWH nga P13 milyones alang sa rehabilitasyon sa mga kasamtangang detention ponds.

Dugang pa ni Guardo nga mas praktikal kini kaysa magtukod og retention ponds isip maoy permanente nga punduhanan sa tubig uwan ug mas gasto sab kung ipadayon ang pagtukod.

Sa habagatang distrito, si Guardo niingon nga mohimo siya og follow-up sa usa ka golf course kalabot sa drainage system niini ug ingon man detention pond aron mapugngan ang pag-agas sa tubig.

Ipresentar sab sa grupo ang ilang findings ug rekomendasyon ngadto kang Mayor Garcia karong adlawa.  “We told DPWH to give us time na pa present lang ni namo among findings and recommendations kay Mayor then if go na si Mayor, proceed na pud sila sa ilang project,” suma pa Guardo. — /IBM (BANAT NEWS)