P235 milyong ihatag sa Kapitolyo sa mga mayor sa probinsiya sa Sugbo

CEBU, Philippines —  Mokabat sa P235 million ang ihatag sa Kapitolyo ngadto sa mga mayor sa Probinsya sa Sugbo nga sakop sa League of Municipalities of the Philippines (LMP) Cebu Chapter. Ang LMP-Cebu mipahigayon sa ilang tinuig nga year-end general assembly ug Christmas party sa usa ka hotel sa dakbayan sa Sugbo niadtong Disyembre 6, diin gitambongan kini ni gobernador Gwendolyn Garcia.

Sa iyang mensahe si Garcia nagkanayon nga ang tanang mga mayor nga mitambong sa maong general assembly makadawat og tag P5 million nga kantidad alang sa proyekto sa imprastraktura nga buot ipatuman sa ilang tagsa tagsa ka LGUs o mga lungsod.

Sumala sa Capitol Information Office, 43 ka mga municipal mayors gikan sa 44 ang mitambong sa maong tigom, samtang upat gikan sa unom (6) ka mga mayor sa component cities ang misalmot sa susamang kalihokan.

"This means that at least P235 million will be distributed by the provincial government to the LGUs for the infrastructure development programs of the local chief executives of Cebu’s towns and cities" sumala sa Capitol media arm, Sugbo News.

Ang Presidente sa LMP Cebu ug mayor sa Daanbantayan nga si Sun Shimura mipadayag sa iyang pagpasalamat sa gobernador sa kanunay nga suporta niini sa mga programa sa mga local chief executives.

Sila si Congressman Pablo John "PJ" Garcia sa tersero distrito, 6th District Board Member Glenn Anthony Soco, Cebu City Mayor Raymond Garcia ug Ako Bisaya Partylist second nominee Carissa Garcia, ang mitambong sab sa maong kalihokan sa LMP Cebu. Mitambong usab sila si Senator Bong Go, Senator Francis "Tol" Tolentino, Deputy Speaker Camille Villar, kanhi Senator Bam Aquino ug kanhi DILG Secretary Benhur Abalos Jr.