Tulo ka kilong marijuana nasakpan

CEBU, Philippines — Nasakmit sa mga operatiba sa Philippine Drug Enforcement Agency(PDEA)-7 Seaport Interdiction Unit ang tulo ka kilong marijuana dihang nagpahigayon sila og routine random K9 inspection sa warehouse sa usa ka package-forwarding company sa Barangay Subangdaku, Dakbayan sa Mandaue, Huwebes sa hapon, Disyembre 5, 2024.

Nagkanayon si Leia Alcantara, tigpamaba sa PDEA-7 nga ang Seaport Interdiction Unit sa ilang ahensiya maoy gitahasan sa pagsusi sa mga warehouse basta moagi og seaport ang mga kargamento.

"Kato siya package-forwarding company giagi ‘to og barko ang shipment so sila ang in-charge, random na siya nga inspection but routine so naa gyud tay mga naka schedule nga inspection sa mga warehouses," sigon ni Alcantara.

Na-tayming matud pa nga nag-inspeksyon ang personnel sa Seaport Interdiction Unit sa maong warehouse sa Barangay Subangdaku.  Naay duha ka parcels, ang usa niini kay duha ka blocks ang sulod.

Pagpasada sa K9 dog nakabantay kini sa parcel hinungdan gikuha sa otoridad ug gipasimhot sa ilang K9 ug kalit nga nilingkod ang iro indikasyon nga dunay kontrabando sa sud.

"Kay naa man sila'y probable cause ilahang giablihan ang parcel ug didto nakita nila nga naa gyuy blocks of marijuana," matud ni Alcantara.

Nasayran nga taga National Capitol Region ang nagpadala sa marijuana nga nagkantidad og P360,000 ug duha ka lalake nga taga Metro Cebu ang modawat niini.

"Actually ang receiver pwede na gyud siya pakasuhan, section 5 attempted distribution kay ang section 5 man gud kung inyong tan-awon sa balaod daghan siya dili lang siya selling so under ang distribution sa section 5 ang katong  recipients pud makasuhan to sila  bale mahulog nga conspiracy or section 26 sa balaod kay sila conspiracy in the distribution of dangerous drugs," asoy ni Alcantara.

Nakig-alayon sab ang  PDEA-7 sa ilang counterpart sa NCR isip kabahin sa ilang imbestigasyon.--

Samtang nadakpan sa mga operatiba sa PDEA Negros Oriental Provincial Office uban ang Regional Intelligence Unit ug Sibulan Municipal Police Station ang 39-anyos nga lalake sa buy-bust operation sa Purok 2, Barangay Ajong, Lungsod sa Sibulan, Probinsya sa Negros Oriental, Huwebes sa hapon, Disyembre 5, 2024.

Nasakmitan ang suspetsado og pito ka putos sa gituohang shabu nga nitimbang og gramos ug nagkantidad og dul-an P50,000, buy-bust money ug ubang non-drug evidence.

Ang maong operasyon resulta sa impormasyon nga nadawat sa mga operatiba labot sa illegal nga kalihukan sa suspetsado.  IBM BANAT NEWS