Waiter nga nangumot og dughan ug bugan sa iyang kainom gipadakop

CEBU, Philippines — Napriso ang usa ka waiter human kini gireklamo nga nangumot matud pa og dughan ug bugan sa usa ka 29-anyos nga babaye kagahapon sa kaadlawon, Biyernes, Disyembre 6, 2024 sa Barangay Guadalupe, siyudad sa Sugbo.

Ang gireklamo mao si alyas Al, 29 anyos, dunay kapuyo, waiter ug nagpuyo sa Sitio Kamanggahan, Barangay Guadalupe ug karon nagtingkagol sa Guadalupe Police Station 9.

Samtang ang reklamante taga Barangay Guadalupe ra usab apan wala na moatubang sa mga tigbalita. Nagpakitabang ang biktima sa kapulisan kay giingong gabinastosan siya  suspek samtang sila nagtagay.

Sa pakighinabi sa dySS Super Radyo Cebu sa suspek hugtanon niyang gihimakak ang pasangil sa reklamante.  Aksidente lang matud pa nga nahikapan ang dughan sa biktima kay langas na kaayo tungod sa kahubog.

Giklaro sab sa suspek nga wala siya nanghikap og bugan, igo ra niya gikuptan sa paa ang biktima samtang iyang gitunolan og tagay. Nangayo hinoon siya og pasaylo sa biktima. Kasong acts of lasciviousness ang atubangan sa suspect.  IBM BANAT NEWS