CWD aduna pay mga lugar nga wala ma-cover sa ilang serbisyo

CEBU, Philippines — Bisan pa nga gipalapdan na sa Carcar Water District (CWD) ang serbisyo niini ngadto sa tanang barangay sa maong dapit ilang giangkon nga daghang lugar pa ang gikinahanglang ma-cover sa ilang serbisyo ilabi na sa mga bukirang barangay.

Si Atty. Edward Remo, CWD general manager nagkanayon nga sa buwan sa  Nobiyembre niining tuiga nakaserbisyo na sila sa 76 porsyento sa kinatibuk-ang populasyon sulod sa ilang service coverage nga maoy labing taas sa tibuok rehiyon.

Apan adunay mga panimalay sa bukirang barangay nga wala maabot sa ilang water service sama sa Barangay Calidngan nga labing gamay diin 19 porsyento ra ang naabot, gisundan sa Barangay Napo nga anaa sa 21 porsyento ug Barangay Buenavista nga 32 porsyento base sa datos sa CWD.

Aron matubag kini, aduna sila’y ongoing project sa pakigtambayayong sa Vitens Evides International (VEI), usa ka water provider sa Netherlands aron matabangan ang mga nagpuyo nga layo sa ilang distribution lines ilabi na sa mga bukirang barangay ug kadtong adunay pinansiyal nga kabalaka nga naglisod og avail sa ilang water services.

Ang phase 2 sa ilang proyekto nga gisugdan niadtong tuig 2022 ug gilaomang mahuman karong tuiga nagtinguha sa paghatag og suplay sa tubig ug uban pang water concern services ngadto sa 1,665 ka dugang nga panimalay o 10,218 low-income individuals.

Nagtabang usab sila sa lima ka mga eskwelahan ug gipausbaw ang suplay sa tubig sa usa ka provincial hospital sa lugar.

Subay niini, si Remo nagkanayon ang mga distrito sa tubig gitukod aron matubag ang suplay sa tubig ug sanitasyon apan ang sanitasyon nagpabilin nga ubos sa tibuok nasud. Matud niya nga posible ang kontaminasyon sa groundwater nga kasagaran tungod sa dili maayo nga pagmentinar sa mga septic tank ug sa paspas nga pagdaghan sa populasyon.

Ug gitinguha sa ilang buhatan nga malikayan kini pinaagi sa ilang gi-lobby nga  ordinansahon ngadto sa kagamhanan sa siyudad diin giapubos na kini sa public hearing.

Dugang ni Remo nga gipaabot nila karon ang pagpalabang sa maong ordinansahon aron makasugod sila sa pagtukod og pasilidad ug pagpatuman sa usa ka programa sa pagdumala sa kaluwasan taliwala sa mga hagit sa pinansiyal ug sa taas nga proseso niini. BDB BANAT NEWS