Rama patubagon sa Comelec sa reklamo batok kaniya  

CEBU, Philippines — Si kanhi Cebu City mayor Michael Rama gimandoan sa Comelec first division sa pagtubag sulod sa lima ka adlaw kabahin sa petition for disqualification alang sa piniliay sa Mayo 2025 batok kaniya.

Base sa summon letter nga gipirmahan ni Atty. Geneis Gatdula nga pinetsahan niadtong Disyembre 5, 2024, nimando ang Comelec kang Rama sa pagduso sa iyang "answer cum memorandum" o pagtubag sa petition for disqualification batok kaniya nga giduso ni Jundel Bontuyan.

Sa petition nga gisang-at ni Bontuyan niadtong Oktubre 18, 2024 ngadto sa Comelec iyang gipadayag nga napamatud-an nga guilty si Rama sa nepotism ug grave misconduct nga mga kaso sa Office of the Ombudsman nga adunay mga silot lakip ang pagkatangtang niini sa katungdanan ug perpetual disqualification gikan sa paghupot sa bisan unsang matang sa pagpangalagad sa publiko.

Niluwat usab og resolusyon ang Comelec sa pagkanselar sa tanang certificate of candidacy sa mga kandidato nga adunay penalty nga disqualification gikan sa Ombudsman.

Apan temporaryo nga gipahunong sa Korte Suprema ang Comelec sa pagpatuman sa ilang resolusyon nga nagdili sa indibidwal nga gitaktak sa Ombudsman sa serbisyo pagdagan sa katungdanan sa publiko bisan pa sa nag-ung-ong nga apela.

Si Rama nakakuha kini og Temporary Restraining Order (TRO) gikan sa Korte Suprema diin mamahimo pa siya nga makadagan sa sunod nga piniliay.

Ug kon ma-disqualify sa Comelec si Rama dili na mahimong kabahin ang iyang pangalan sa opisyal nga kandidato sa pagka-mayor sa Dakbayan sa Sugbo. BDB BANAT NEWS