CEBU, Philippines — Nadakpan sa mga operatiba sa Provincial Intelligence Unit-Police Drug Enforcement Unit sa Bohol Police Provincial Office (BPPP) ang usa ka giingong high value individual kinsa nakuhaan og binulto nga drugas atol sa buy-bust operation ngadto sa Purok 3, Barangay Bao, Tagbilaran City.
Ang suspetsado mao si Teresito Salinas, 44-anyos, nagpuyo sa Purok-2, Barangay Ubujan, Tagbilaran City.
Nasakmit sa kapolisan gikan sa suspetsado ang 1,800 gramo nga shabu nga nikantidad ngadto sa P12.2 milyones.
Base sa taho sa PIU-PDEU BPPO nga nadakpan na kaniadto ang suspetsado gumikan gihapon sa kalambigitan niini sa illegal nga drugas apan nakagawas tungod kay nipaubos sa plea barganing.
Padayon nga gisuta sa kapolisan ang tinubdan sa ginadiling drugas sa suspetsado diin giingong ang transaksiyon niini gikan sa usa ka convicted drug personality nga anaa sa usa ka dakong prisohan.
Sa laing bahin, nadakpan atol sa buy-bust operation sa Philippine Drug Enforcement Agency (PDEA)-7 ug Regional Intelligence Unit (RIU)-7 ang usa ka construction painter niadtong Sabado sa gabii diha sa Sitio Upper Banica, Barangay Lahug, Siyudad sa Sugbo.
Ang suspetsado mao si Edgar Duhilag, 49-anyos, residente sa naasoy nga dapit.
Nasakmit sa kapolisan gikan sa suspetsao ang 50 gramong shabu nga nibalor ngadto sa P340,000 ug buy-bust money.
Giingong ang suspetsado maka-dispose og 200 gramo nga shabu matag semana. (BANAT NEWS)