CEBU, Philippines — Patay ang usa ka 29-anyos nga lalake human kini gipusil sa nag-inusarang suspect sa F. Jaca Street, Barangay Kinasang-an, siyudad sa Sugbo, Miyerkules sa gabii, Nobiyembre 20, 2024.
Ang biktima mao si Jakyl Rosaceña, 29 anyos, nagpuyo sa Sitio Sto. Niño, Barangay Mambaling ning siyudad.
Samtang ang suspek nagsul-ob og itom nga jacket, itom nga face mask ug blue maong shorts.
Nakadawat og tawag ang Inayawan Police Station 7 sa Cebu City Police Office labot sa nahitabong pagpamusil sa naasoy nga dapit ug sa ilang pag-abot nila sa lugar nakit-an nila ang biktima nag-ubo sa yuta sa gamay nga eskina nga wala nay kinabuhi. Giingong gisundan sa mamumuno ang biktima sa gamay nga eskina ug didto gipusil gamit ang kalibre .45 nga armas diha sa likod hinungdan sa kamatayon sa biktima.
Nagkanayon si Police Major Jeciree Basitao, hepe sa Inayawan Police Station 7 nga wala'y rekord sa ilang istasyon ang biktima.
Apan nahibaw-an nila sa ilang imbestigasyon nga naabot sa dapit ang biktima kay matod pa dunay ka-transaksyon sa illegal nga drugas.
"Naestorya nato ang igsuon aning biktima natingala pud siya nganong naabot diri. Mao ‘to among gipangutana ingon siya basin naabot na diri kay naa na nay ka-transact unya nakuha nato information positive gyud nga naay ka transact," sigon ni Basitao.
Nahibaw-an sab sa kapulisan nga giingong dako og utang sa illegal nga drugas ang biktima tungod kay wala naka remit sa mga gipangingil niini.
Nagtuo ang kapulisan nga ang gikuhaan niini og illegal nga drugas posibleng maoy nagpaluyo sa pagpatay kaniya.
Nasuta sab nga dili kini unang higayon nga gipusil ang biktima, kay sa miaging tuig gipusil sab kini didto sa Barangay Mambaling unya giparlaga sa pamilya ngadto sa probinsya. IBM BANAT NEWS