Walo ka mga kawani sa Cebu City Hall gipatubag

CEBU, Philippines — Mokabat sa 8 ka mga Job Order ug Casual nga trabahante sa Cebu City hall ang gihatagan og 72 oras sa pagduso sa ilang tubag kung nganung dili sila angay pahamtangan ug kasong administratiba.

Kini ang gibutyag ni Henry Tumalabcab ang pangulo sa Human Resource Development Office nga nahinabi sa Banat News/DyRF1215.

Matud pa ni Tomalabcab adunay 8 ka mga casual, co-terminos ug Job Order ang gihatagan o gipadalhan og notisya sa pagtubag nganung dili sila pahamtangan ug admin case subay sa giingong kalapasan sa code of ethics sa mga kawani sa gobyerno.

Sa walo nga gipadalhan aduna pay duha nga wala mapadalhi tungod kay dili makit-an ang maong mga trabahante nga gikan sa lain-lain nga buhatan sa city hall.

Ang maong mga trabahante gimanduan sa paghatag og katin-awan ngadto sa buhatan ni Mayor Raymond Alvin Garcia human sila giingong nakit-an atol sa rally niadtong November 8, 2024 diin nahitabo usab ang pagsulod ni Atty. Collin Rosell sa City Hall aron mobalik na sa pwesto isip city administrator.  MEL BANAT NEWS