CEBU, Philippines — Gitinguha karon sa Probinsiya sa Sugbo nga adunay standard nga kalimpiyo nga sundon ang mga resort sa tibuok lalawigan isip usa sa mga lakang aron makahatag og mas gipalambo nga serbisyo sa mga bisita niini.
Atol sa tigom tali ni Gobernador Gwendolyn Garcia uban ang mga operator ug tag-iya sa mga resort niadtong Nobiyembre 16, 2024 ang gobernadora nagkanayon nga kinahanglan nga i-level up sa mga accommodation establishments ang ilang pag-atiman sa mga bisita.
“We are going to bring up the level of tourism dinhi sa Cebu nga bisag kinsay moanhi, bisag unsa nga resort or accommodation, mahalon ba na kaayo o bahalag backpackers, duna tay standard of cleanliness nga ang tanan mosunod”, matud ni Garcia base sa taho sa Sugbo News.
Aron nga mapalig-on ang maong tinguha gihangyo ni Garcia ang hunta probinsiyal nga mopasar og ordinansa nga molatid sa polisiya sa paglimpiyo sa mga resorts ug ubang tourism establishment sa lalawigan.
Si Garcia nakigtagbo kini sa mga resort operator alang sa pagpangandam sa umaabot nga Suroy-Suroy Sugbo Southern Heritage Trail karong umaabot nga Nobiyembre 22 ngadto sa 24, 2024. (BANAT NEWS)