CEBU, Philippines — Ang Bureau of Fisheries and Aquatic Resources Central Visayas niawhag sa mga Local Government Units nga sa higayon nga adunay makit-an nga patay nga mananap sa dagat mas maayo ilubong kini dayon.
Usa kini ka pamaagi aron mapugngan ang posibleng pagka-kontamina sa ilang baybayon gikan sa mga kagaw o sakit nga dala aning mga namatay nga mga mananap.
Paglikay kini nga dili makatakod sa mga binuhing kahayupan sa ilang mga lungsod ug ilabi na sa mga tawo.
Si Johann Tejada, Technical Assistant, BFAR-7 miingon nga ang kadtong nadugta na nga mananap nga halos kalabira nalang nga nakita sa baybayon sa
Barangay Canaboon sa lungsod sa Dumanjug niadtong Lunes gituohang iya sa usa ka matang sa balyena. Giangkon hinuon niya nga tungod kay nadugta naman kini lisud na ilhon kun unsa gyud kini nga mananap.
Dugang pa ni Tejada, kung ilaha gayud kining i-verify kun unsa kini nga mananap kinahanglan pa silang mokuha og sampol niini, apan giangkon niya nga taas ug makuti kaayo nga proseso.
Giawhag ni Tejada, ang katawhan nga kung makakita ug mga sama niini mas maayong ilubong nalang kini dayun ug dili pasagdang madugta sa ilang baybayon. (BANAT NEWS)