CEBU, Philippines — Nakompiskar sa nga operatiba sa Provincial Intelligence Unit/Police Drug Enforcement Unit sa Cebu Police Provincial Office(CPPO) ang kapin usa ka kilo nga illegal bga drugas atol sa ilang buy-bust operation sa Purok 2, Barangay San Vicente, Lungsod sa Liloan niadtong Lunes sa gabii, Nobiyembre 11, 2024.
Ang maong drugas nasakmit gikan sa usa ka ex-convict nga si Neil Laurito Gonzalez,44 , dunay kaipon ug taga Barangay Cabungahan, dakbayan sa Danao.
Nibalor og P7.1 million ang illegal nga drugas nga nasakmit sa mga operatiba gikan sa dinakpan. Nasayran ang suspetsado usa ka mekaniko apan mi-sideline pagpamaligya og illegal nga drugas.
Duha na semana nga gipaubos sa monitoring ang suspek ug nahibaw-an nga maka dispose kini og usa ka kilo nga shabu kada semana. Ang area of operation niini kay Lungsod sa Consolacion hangtud na sa dakbayan sa Danao.
Nasuta nga niadtong Septiyembre 5, 2017 nadakpan ang suspek gumikan gihapon sa pagkalambigit niini sa illegal nga drugas ug nakagawas niadtong Septiyembre 27, 2024.
Kasong kalapasan sa Section 5 ug 11, Article II sa Republic Act 9165 ang ipasaka batok sa suspetsado. (BANAT NEWS)