Mas daghang tawo bisperas palang sa Kalagkalag

CEBU, Philippines — Si Konsehal Philip Zafra, Chairman sa Committee on Peace and Order sa Cebu City Council miingon nga malinawon ug hapsay ang duha ka adlaw nga pag-obserbar sa Kalag-Kalag sa dakbayan.

Gidayeg ni Zafra ang lokal nga puwersa sa kapolisan pinangulohan ni Police Colonel Antonietto Cañete, kinsa usab personal nga misusi sa mga sam-ang.

Gidayeg usab ni Zafra ang mga force multipliers, barangay tanod, ug mga sakop sa Cebu City Traffic Office (CCTO), ug uban pa, nga maoy nanguna sa sitwasyon aron masiguro ang hapsay nga observance.

Dugang pa, si Zafra nagpasalamat usab sa publiko kay nakita nga mas maayo ang kooperasyon karon sa mga guidelines nga gipatuman sa kagamhanan sa dakbayan.

Samtang walay nakasiguro kun pila gyud ang gidaghanon sa mga tawong nanuaw sa mga sam-ang , apan si Zafra miingon nga nabantayan nga mas daghan ang nidagsang mga tawo bisperas palang, Oktubre 31, ug dili sa aktwal nga mga adlaw sa pag-obserbar sa Nobiyembre 1 ug 2.

Niadtong Oktubre 28 pa, si Zafra miingon nga ang ilang kinatibuk-ang deployment naplastar na tungod kay na anticipate nila nga magsugod na sa pagdagsa ang mga bisita.

Sa pikas bahin, malinawon sab nga nahuman ang kalagkalag sa Dakbayan sa Talisay sumala pa ni ni Police Lt. Col. Epream Paguyod, hepe sa kapolisan sa Talisay.

Si Paguyod niingon nga adunay mga butang nga gipangdili nga ilang nasakmit diha sa ganghaan sa menteryo apan giuli ra sab nila kini sa dihang mopauli na ang mga tag-iya sa mga butang. — Gabriel Bonjoc/IBM (BANAT NEWS)