Cleft Care Center modawat og mga pasyente sa laing lugar

CEBU, Philippines — Ang Cebu Comprehensive Cleft Care Center of Excellence medical director nga si Dr. Fremont Base nagkanayon nga modawat sila og mga pasyente nga naggikan sa laing local government units sa Cebu aron mokunhod ang cleft lip and palate cases kun mga bungi.

Sukad pa niadtong Septiyembre, nagsugod na sila og pagpanawat og pasyente sa ilang pasilidad nga anaa nahimutang sa Cebu City Medical Center.

“(The CCCCCE aims) to address the increasing number of cleft lip and palate patients sa region. About 700 to a thousand patients are born every year,” suma pa ni Base atol sa CCMC’s Punto Medikal teleradyo program pinaagi sa Sugboanon Channel.

Gitukod ang CCCCCE pinaagi sa koordinasyon sa CCMC, Kagamhanan sa Dakbayan sa Sugbo, Operation Smile International (OSI), ug Mariquita Salimbangon Yeung (MSY) Charitable Foundation.

Giangkon ni Base nga aduna pay backlog nga moabot ngadto sa dili momenus 50,000 ka mga pasyente ang wala pa maoperahan.

Gipasalig ni Base nga ang CCCCCE makahatag og hingpit nga pag-atiman niadtong adunay cleft lip and palate nga mga pasyente sa higayon nga mahibaw-an ang deformity.

“Ang treatment dili magsugod sa operation, magsugod sa pagpanganak. Once makit-an sa obstetrician, makit-an sa pediatrician, ihatod dayun sa center para masugdan nato ang ilang treatment,” suma pa ni Base.

Ang mga walk-in patients mamahimong i-screen dayon lakip na ang pre-surgical orthodontic examination aron masuta ang cleft lip and palate.

Human sa operasyon, ang pasyente hatagan og komprehensibo nga serbisyo sa pag-atiman sa cleft sama sa speech therapy, libre nga pag-atiman sa ngipon ug pagtambag, ug uban pa. —/MEL (BANAT NEWS)