CEBU, Philippines — Gipatas-an sa Philippine Health Insurance Corporation (PhilHealth) Central Visayas ang benepisyo alang sa mga pasyente nga dunay breast cancer, gikan sa P100,000 ngadto sa P1.4 milyones pinaagi sa Z benefits package.
Sa Pilipinas, ang breast cancer mao ang nag-unang kanser sa kababayen-an diin sumala pa sa usa ka pagtuon, kasagaran sa mga kaso anha na ma-diagnosed sa mga advanced stage tungod sa limitadong early detection ug mga opsyon sa pagtambal.
Ang Oktubre nagtimaan sa Breast Cancer Awareness Month—usa ka panahon aron magkahiusa sa paghatag og kasayuran bahin sa usa ka balatian nga nakaapekto sa milyon-milyon ka kababayen-an tibuok kalibutan.
Ang Cebu-based oncologist nga si Dr. Amabelle Trina B. Gerona nipadayag sa kamahinungdanon sa regular nga screening, nga nagrekomendar og tinuig nga mammograms para sa kababayen-an nga kapin na sa 40 anyos ug klinikal nga eksamin kada 1-3 ka tuig alang sa mga 25 anyos pataas.
Apan tungod sa kamahal sa gastohan alang niini ug uban pang pinansyal nga problema, mapugngan ang sayo nga pagpatambal sa mga kababayen-an.
Ang gipatas-an nga package naglakip na karon sa mga therapies ug surgeries alang sa mga pasyente nga dunay breast cancer gikan Stage 0 hangtud sa Stage IV.
Dugang niana, ang mga pasyente nga naoperahan gikan sa laing tambalanan mahimong magpadayon sa ilang pagtambal sa usa ka gikontrata nga pasilidad sa panglawas ug makapahimulos sa package, nga wala’y co-payment alang sa mga na-confined sa basic accommodations sa mga pasilidad nga gikontrata.
Subay niini , ang Regional Vice President sa PhilHealth VII nga si Marjorie A. Cabrieto nag-awhag sa daghang mga ospital sa pag-apil sa programa, aron masiguro nga mas lapad ang access sa mga treatment sa breast cancer. — MEL BANAT NEWS