Vlogging competition sa SK

CEBU, Philippines — Usa ka vlogging competition ang ipahigayon sa Probinsya sa Sugbo ug sa Sangguniang Kabataan (SK) sa Probinsya.

Ang SK “Sugvlog Challenge” midapit sa 51 ka Sangguniang Kabataan Federation sa Probinsya aron mapakita ang “unique” nga kultura, turismo, sustainable nga programa ug uban pa sa nagkadaiyang lungsod ug siyudad sa lalawigan sa Sugbo.  Ang maogn programa gi-organize sa buhatan ni Board Member Loren Singco, ang SK Provincial Federation president.

Si Gobernador Gwendolyn Garcia atol sa tigom uban sa mga SK Federation of Presidents, mga bokal, DILG, ug DepEd Divison Superintendents didto sa Kapitolyo niadtong Oktbure 29 nagkanayon nga usa sa iyang nabantayan nga wala kaayoy partisipasyon ang SK sa mga programa ug proyekto sa Probinsya sama sa school feeding program, Sugbo Kahanas, caravan of services ug uban pa.  Aron pagsuporta sa maong programa sa SK Federation ug aron usab nga maningkamot ang mga SK, adunay premyo alang sa makadaog.

P12.1 million ang kinatibuk-ang premyo nga gigahin sa Kapitolyo alang niini. P1 million nga kantidad sa imprastraktura ang ihatag alang sa top 10 nga makadaog nga SKs, walay labot sa tag P100, 000 nga cash prize.

Ang matag lungsod ug siyudad pinaagi sa ilang SK kinahanglan nga makahimo og 3-5 nga minutos nga video content nga ipost sa ilang Facebook pages.  Ang SK sa Probinsya mokuha og mga Cebuano nga vloggers nga maoy mopili sa mga mananaog nga ipahibawo unya sa Disyembre 16 karong tuiga.  MEL BANAT NEWS