13-anyos gitipi tungod sa drugas?

CEBU, Philippines — Dili na makaselebrar karong adlawa, Oktubre 30, 2024,  ang 13-anyos nga lalake human kini gipusil-patay sa duha ka wala mailhing tawo diha sa Sitio Lahing-Lahing 2, Barangay Mabolo, Siyudad sa Sugbo gabii sa adlaw'ng Lunes, Oktubre 28.

Ang biktima nga 13-anyos, residente sa naasoy nga dapit gipusil diha sa iyang likod ug dughan.

Sigon sa 41-anyos nga inahan sa biktima miingon nga kalambigitan sa illegal nga drugas ang posibleng rason nga gipatay ang iyahang bugtong anak.

Nakasulti siya niini tungod kay ang mga barkada matod pa sa biktima mga adik-adik.

Misaysay ang inahan nga nasakpan niya kaniadto ang iyahang anak nga nigamit og illegal nga drugas, naundang apan nibalik na sab sa bisyo.

Gasugod matud pa ang iyahang anak sa paggamit og illegal nga drugas  dihang nag edad pa kini og 9-anyos. 

"Wala ko kahibawo kinsa kay wala man sad ko kabalo kinda sad na(suspect)...unsaon nako pag kuan sa barkada dili man pa estoryahon sa akoa ang ilang mga anak, gipangtagoan," sigon sa inahan sa biktima.

Sigon pa sa mga silingan ngadto niya nga dihang gipusil ang iyahang anak niingon pa kini og "Mama tabang, Mama."

Ang biktima didto gipusil sa ikatulong andana sa balay nga padayun pang gitukod nga gihimong tambayanan sa biktima ug mga barkada niini.

Human napusilan ang biktima natagak kini sa ubos ug giingong gitiwasan pa sa mga mamumuno maong naigo kini sa likod ug dughan. Gatuo ang inahan nga gigamit sa sindikato ang iyahang anak.

Gitug-an sa inahan nga sukad sa miaging buwan wala na mag-ulian sa ilang panimalay ang iyahang anak . Kung mouli man gani igo ra maligo ug magkuha sa bawon.

Nakahibawo nalang siya nga wala na kini mosulod sa klase  dihang  gipahibawo siya sa maestra.

"Katong maghatod ko moingon man ang maestra nga wala nisulod, mouli, pag grade 8 gasugod, last year," sa inahan pa sa biktima.

Giangkon sa inahan nga nagkulang gyud siya ug wala niya magahini og oras ang anak sanglit solo parent siya ug nagtrabaho para nila.

Wala'y death threats nga nadawat ang biktima apan giingnan na siya matod pa sa mga silingan nga dili pagawson ang iyahang anak maong gaduda siya nga giplanuhan gyud kini sa pagpatay.

Nangayo og tabang ang inahan sa kagamhanan sa siyudad sa Sugbo nga mapahiluna ang iyahang anak.

"Mangayo ko’g tabang ba, kalit-kalit man gud kay ni gud, nga matabangan nga ma plastar akong anak kay lisod pud kaayo ako ra usa gud," gahilak nga pagpanawagan ang sa inahan sa biktima.

Sa birthday sa biktima karong adlawa spaghetti ug mango float unta ang request niini nga napalit na sa iyahang inahan.

Si Police Major Romeo Caacoy Jr., hepe sa Mabolo Police Station 4 miingon posibleng nalambigit gyud sa illegal nga drugas ang biktima kay sa crime scene dunay 13 ka sachets sa gituohang shabu nga nakuha.

Subayon pa nila kun unsa gyud ang kalambigitan sa biktima sa illegal drug trade kun aktibo ba kining namaligya o gidudahan nga motumbong mao nga kini gipatay.  "Ang posibilidad nga wala siguro mo-remit sa iyahang amo mao na amoa ng gitan-aw," matud ni Caacoy. IBM BANAT NEWS