CEBU, Philippines — Ang bagyong Kristine nga toa na karon sa kadagatan sa Ilocos Sur sa Luzon nagbilin gyud og kadaut dinhi sa Sugbu sumala pa sa Cebu Provincial Disaster Risk Reduction and Management Office (PDRRMO).
Base sa talaan sa maong buhatan, usa ka roro barge ang nihandos sa dagkaong balod padung sa baybayon diha sa lungsod sa Minglanilla.
Sumala pa ni Ensign Abel Lomboy, ang tigpamaba sa Philippine Coast Guard sa Central Visayas (PCG-7) nga tungod sa dagkong bawod ug kusog nga hangin dala sa dili maayong panahon napadpad ang LCT Golen Bella sa kabaybayonan sa Sitio Noha, Barangay Calajoan sa maong lungsod.
Matod sa PCG-7 naguba pud ang duha ka angkla niini nga mao untay naggunit nga dili maabot sa daplin apan tungod sa dagkong bawod ug kusog nga hangin naputol kini hiningdan nga napadpad kini sa baybayon.
Padayon ang pagsusi sa Coast Guard sa maong barko kun aduna bay kadaut sa kasko niini nga posibleng makamugna og oil spill.
Ang maong barko nasangad 100 ka metros ang gilay-on gikan sa baybayon sa barangay Calajoan.
Sa pikas bahin, 15 ka motorbanca ang nangaguba ug upat ka panimalay ang nakaangkon ang gamay nga kadaot didto sa lungsod sa Bantayan tungod sa maong bagyo. Aduna pud mga punoan sa saging ug punoan sa lubi nga nangatumba.
Samtang maobot sa kapin gatus ka pamilya pud ang napabakwit sa upat ka lungsod ug syudad sa Probinsya sa Sugbo tungod gihapon sa bagyong Kristine.
Ang 49 ka pamilya gikan sa Talisay City nga termporaryong gipapasilong sa Dumlog Gym; 38 ka pamilya ang gikan sa lungsod sa Argao nga didto gipabakwit sa Argao Complex; duha ka pamilya sa Minglanilla nga atoa temporaryong nipasilong sa mga kabanay ug 14 ka pamilya ang barangay Lombo sa lungsod sa Malabuyoc.
Sobra 200 sab ka mga pasahero sa pantalan sa Hagnaya San Remigio, ug Tangil ports ang natanggong human nakanselar ang byahe sa mga barko.
Samtang 38 ka mga lungsod ug siyudad lukop probinsy ang mikanselar og klase sa mga eskwelahan kagahapon tungod sa dili maayong panahon. IBM BANAT NEWS