CEBU, Philippines — Kapin sa 400 ka pasahero ang na-stranded diha sa nagkadaiyang pantalan apil na sa Sugbo base sa listahan sa Philippine Coast Guard Visayas diin kapin sa 100 niini ang anaa sa mga gymnasium sa Siyudad sa Sugbo.
Nasayran nga 66 ka barko ang wala tugoti nga makalawig sa kadagatan tungod sa bagyong Kristine.
Ang mga na-stranded nga pasahero sa Dakbayan sa Sugbo anaa sa Barangay Tinago ang uban kanila gipahiluna sa ikaupat nga andana sa barangay hall.
Ang pamilya ni Ereberto de Jesus gikan pa sa Cagayan de Oro City nga nieskala sa Dakbayan sa Sugbo kinsa padulong unta mouli sa Masbate ang tulo ka adlaw nga na- stranded human wala tugoti nga makabiyahe ang ilang sakyan nga barko.
Base sa listahan sa Barangay Tinago kapin sa 100 ang stranded nga pasahero nga nipasilong sa ilang barangay hall wala pay labot niini ang 25 ka pasahero nga anaa sa gym sa kasikbit nga barangay sa San Roque diin managlahi ilang destinasyon diin adunay padulong sa Leyte ug Mindanao.
Samtang daghan usab ang naglinya nga mga pasahero sa pantalan sa siyudad nga namasin nga makalukat og ticket aron makalarga kong adunay clearance gikan sa PCG ug adunay nagpa re-schedule sa ilang biyahe.
Ang PCG nagpatuman og heightened alert sa ilang area of jurisdiction human gipaubos sa storm signal ang pipila ka mga dapit tungod sa bagyong Kristine
Base sa taho sa PCG nga niabot sa 429 ka pasahero ang na-stranded sa nagkadaiyang pantalan apil na sa Sugbo diin 67 ka sea vessels ang wala tugoti nga makabiyahe.
Sa laing bahin, giandam na sa Visayas Command ang ilang Humanitarian Assistance and Disaster Response (HADR) aron ma-mitigate ang potential impact sa bagyong Kristine sa Visayas Region.
Gi-activate sa Visayas Command ang ilang Disaster Response Team Units (DRTUs) nga gilangkuban sa officers, enlisted personnel ug CAFGU Active Auxiliary sa tanang subordinate units aron masiguro nga sila naka-standby alert.
Gisusi usab ang HADR equipment, communication systems apil ang air ug land mobility assets ug giandam na kini aron magamit dayon kon kinahanglanon.
Hugot nga koordinasyon tali sa Local Disaster Risk Reduction and Management Councils ang gihimo aron masiguro ang han-ay nga disaster-response.
Si Lieutenant General Fernando Reyeg, commander sa VisCom nipasalig sa ilang kaandam ngadto sa publiko.
Samtang patay na nga nakaplagan ang 70-anyos nga lalaki nga unang gikatahong missing niadtong Oktbure 21 uban sa duha pa ka kauban niini human nitikyaob ang motor-banca nga ilang gisakyan samtang nagpadulong sa Lungsod sa Pilar, Isla sa Camotes.
Ang biktima nailhan nga si Rodulfo Villar diin ang patay’ng lawas niini napaldto ditto sa kadagatan sa Lungsod sa Merida, Leyte base sa taho sa Provincial Disaster Risk Reduction and Management Office (PDRRMO).
Ang duha ka kauban niini nga sila si Jesse Añasco ug Junrex Lanogan unang na-rescue kagahapon didto sa kadagatan sa Lungsod sa Pilar. Nunot niini, tulo ka mananagat nga unang gikatahong missing ang na-rescue didto sa Biasong, San Isidro, Leyte. Ang maong mga mananagat mao sila si Raul Arreglo, Celso Arreglo ug Chirstopher Cruz nga taga Lungsod sa Daanbantayan.
Samtang ang mananagat usab nga si Carlos “Carling” Macan Casque, 73-anyos nga taga Barangay Banhigan, Lungsod sa Dalaguete didto na napadpad sa Lungsod sa Loon, Probinsiya sa Bohol human nahutdan og petrolyo.
Subay sa pagkuso-kuso sa bagyon Kristine, 49 ka pamilya sa Dakbayan sa Talisay ang nibakwit diha sa Dumlog Gym sa maong siyudad ug 72 usab ka pamilya sa Lungsod sa Bantayan.
Gawas sa mga nibakwit nga mga indibidwal ang baygong Kristine maoy hinungdan nga ang 51 ka lungsod ug siyudad sa Probinsiya sa Sugbo ang nikanselar sa klase ug ubang kalihokan nga adunay kalimbigitan sa turismo.
Sa pagkakaron, nagpabilin nga blue alert status ang PDRRMO diin padayon kining nag-monitor sa kalungsoran hilabina nga gipaubos sa PAGASA ang pipila ka mga lungsod ug siyudad sa northern ug Metro Cebu sa tropical cyclone wind signal number 1.
Apil sa gipaubos sa signal number 1 ang Alcantara, Argao, Dumanjug, Sibonga, Pinamungahan, Ronda, Liloan, Moalboal, Consolacion, Danao City, Borbon, Carmen, Daanbantayan, Tuburan, City of Bogo, Tabogon, City of Naga, Lapu-Lapu City, City of Carcar, Mandaue City, Catmon, Minglanilla, Toledo City, Cordova, Compostela, San Remigio, Balamban, Aloguinsan, San Fernando, Asturias, Barili, Medellin, Sogod, Tabuelan, City of Talisay, Bantayan Islands ug Camotes Islands.
Sa laing bahin usab, gikataho nga 14 ka tawo ang patay ngadto sa Bicol gumikan sa bagyong Kristine diin 12 niini sa Central City of Naga ug duha sa Lungsod sa Palanas, Masbate ug Lungsod sa Bagamanoc, Probinsiya sa Catanduanes. — Le Phyllis F. Antojado, Decemay P. Padilla (BANAT NEWS)