Human rights groups gustong ipadakop si Duterte

CEBU, Philippines — Ang human rights group nga Karapatan miingon nga ang mga testimoniya ni kanhi police colonel Royima Garma, uban sa mga pamahayag sa mga pamilya sa mga biktima sa dugoong drug war sa administrasyong Duterte, usa ka bug-at nga basihan para sa International Criminal Court (ICC) para ipadakop ang kanhi pangulo, sumala pa sa report sa One News PH.

Samtang si PNP Chief Philippine National Police (PNP) chief Gen. Rommel Francisco Marbil mipagawas og direktiba niadtong adlaw nga Sabado Oktobre 12 agi og aksyon may kalabotan sa rebelasyon ni Garma sa atubangan sa mga sakop sa House of Representatives quad committee hearing.

 “We will investigate,” matud pang Marbil apan wala pa siya mobutyag unsa nga police unit ang mohimo sa imbestigasyon.

Si Garma kinsa nadestino sab kaniadto sa Criminal Investigation and Detection Group (CIDG) miangkon nga gitawgan siya ni Duterte nga paadtuon sa balay sa naulahi didto Davao City ug didto gipapangita siya og polis o operatiba nga maoy padad-on sa “Davao model” nga kampanya sa war on drugs sa tibuok nasud.

Si Garma kinsa usa sa mga gibansagang top cops sa nakalabay nga administrasyon niluwat og pinanumpaang pamahayag nga nagtumbok kang kanhi presidente Rodrigo Duterte nga maong personal nga mimando kaniya aron buhaton ang “Davao model” sa tibuok nasud.

Tungod niini dunay cash reward nga ihatag sa mga polis sa matag drug suspects nga ilang mapatay , gikan sa P20 mil ngadto sa P1 milyon depende sa gidak-on sa drug personality.

Si Garma kinsa nahimo sab nga hepe sa Cebu City Police Office naghilak nga niluwat sa maong pamahayag atubangan sa mga kongresista sa quad-committee hearing mahitungod sa drug war ug extrajudicial killings.

Si kanhi mayor Tomas Osmeña kinsa usa sa mga resource person nga giimbitar sa quad-committee pipila ka semana na ang nakalabay miingon nga aduna siyay kompletong talaan sa mga gipatay sa Cebu City sa dihang si Garma pa ang hepe sa CCPO. Apan ang mga kaalyado ni Duterte kusganong mihimakak sa gipangbutyag ni Garma. Si Senador Ronald “Bato” dela Rosa miingon nga wala siyay kasayuran anang reward system kay ang iyahang gilusad mao ra ang “Oplan Tokhang.”

Apan ang Oplan Tokhang gitumbok sab sa mga human rights groups nga gigamit aron ilhon ug tultolon ang mga nalambigit sa ilegal nga drugas diha sa mga barangay aron pang-likidahon. Samtang si Senador Christopher Lawrence “Bong” Go kinsa gialegar sab ni Garma nga direktangn nalambigit sa  pagpadagan sa maong kampanya mihimakak sab sa pasangil ug mihulagway nga “diversionary tactic” kini ni Garma aron matabunan ang giatubang karong imbestigasyon batok sa maong opisyal may kalabotan sa pagpatay.

Ang gipasabot ni Go mao ang kabahin sa pagpatay kang kanhi PCSO board secretary nga retiradong heneral sa kapolisan nga si Wesley Barayuga niadtong Hulyo 2020.

Si Barayuga gipusil og lalaking nag-motor samtang luwan sa sakyanang giisyu ni Garma nga adtong tungora maoy general manager sa PCSO. Si  Barayuga gikatahong gikatakdang motestigo batok ni Garma bahin sa kurapsyon niini diha sa PCSO. Si PNP public information officer Brig. Gen. Jean Fajardo miingon nga subling ablihan sa CIDG ang ilang imbestigasyon ug pagdokumento sa kaso ni Barayuga ug maapil si Garma ug ubang mga pangalang nabutyag sa quad-committee sa makasohan og murder.

Tungod niining mga rebelasyon giawhag ni Karapatan secretary general Cristina Palabay ang International Criminal Court (ICC) nga mopagawas na og warrant of arrest batok kang Duterte ug mga kaubanan tungod sa paggamit sa PNP isip “death squad.”

Ang nakalabay nga administrasyon nibutyag nga kapin 6,000 ka drug suspects ang napatay sa shootout atol sa anti-drug operations, apan ang Bagong Alyansang Makabayan miingon nga dili kini tinuod, sanglit moabot sa kapin 30 mil ang napatay.

Gipasangil sa grupo nga ang war on drugs ni Duterte gigamit aron likidahon ang mga kritiko ni Duterte pinaagi sa pagpasangil nga nalambigit sila sa ilegal nga drugas.