CEBU, Philippines — Gipahimangnoan sa Philippine Statistics Authority (PSA) ang publiko bahin sa mga "fake news" nga mikaylap sa social media bahin sa pagpanghatag og ayuda alang sa mga naghupot sa National ID ug online nga pagproseso niini apan dunay bayad.
Sa gi-upload nga hulagway sa PSA, makita ang screenshot sa post sa usa ka Facebook page nga ginganlan og "Philsys Updates" nga nag-ingon nga ang tanang adunay National ID sa tibuok nasud makadawat og P5 mil nga ayuda ug nag-awhag pa kini sa mga walay ID nga magparehistro online.
Samtang sa usa ka post usab gikan sa Facebook group nga "City of General Trias, Cavite", dunay nag-post nga nagtanyag siya og online nga pagproseso sa National ID, uban sa ubang government IDs.
Tungod niini nagpagawas ang PSA og public advisory nga nag-ingon nga kining mga indibidwal o grupo nga moproseso og mga government IDs dili otorisado ug peke kini.
Gihimakak sab sa PSA nga nanghatag sila og bisan unsang pinansyal nga tabang sa mga National ID card holders, papel, o digital nga format.
Giklaro sa PSA sila ra ang otorisado nga morehistro sa mokuha og National ID ug wala kini bayad. Diin ang proseso naglakip sa pagkuha sa biometric information sama sa pag-scan sa iris ug fingerprint, nga nagkinahanglan og personal nga presensiya nakuha niini ug otorisadong kawani sa PSA ra sab ang moabag kanila, mao nga dili kini pwdeng buhaton pinaagi sa online.
Mipasidaan ang PSA dakong kalapasan sa Republic Act No. 11055 o ang Philippine ldentification System Act diin ubos sa Seksyon 19 (b), ang dili otorisadong pag-imprenta, pag-andam, o pag-isyu sa maong ID ni bisan kinsang tawo o institusyon. Aduna kini silot nga tulo ngadto sa unom ka tuig nga pagkapriso ug multa nga P1,000,000.00 ngadto sa P3,000,000.00.
Giawhag sa PSA ang publiko nga isumbong kanila kun duna silay mahibaw-ang motanyag nga moproseso og national IDs ilabi kanang naa sa social media.
Alang sa tukma ug kasaligan nga impormasyon sa National ID, ang publiko mahimong mo-refer sa bisan asa sa mosunod nga opisyal nga mga channel: ang National ID website sa https://philsys.gov.ph; Facebook sa PSAPhilSysOfficial; X (kanhi Twitter) sa @PSAPhilSys; ug Viber sa PSA: Philippine Identification System.
Dili palang dugay, ang National Bureau of Investigation -7 nakadakop og duha ka mga babayeng naghimo og mga pekeng BIR –TIN , PhilHealth IDs sa managlahing mga operasyon.
Matud pa nga sa social media sila nagsibya aron itanyag nga moproseso sila paghimo aning maong mga government IDs, apan nasuta nga mga peke ang ilang gihimong mga IDs. (BANAT NEWS)