CEBU, Philippines — Ang Department of Energy (DOE) nipirma og Memorandum of Agreement (MOA) uban sa Department of Environment and Natural Resources (DENR) aron mapadali ang pag-develop sa offshore wind energy nga mga proyekto sa nasud.
Sumala sa press release sa DOE, ang MOA nagtugot sa paggamit sa mga offshore nga mga dapit nga sakop sa wind energy service contracts, lakip na ang mga auxiliary areas atol sa pre-development/exploration, development, ug commercial development, subay sa mga requirements sa DENR.
Sulod sa 30 ka adlaw human sa pagpirma sa kasabutan, ang DOE gikinahanglan nga maghatag sa DENR og listahan sa mga giila nga offshore wind projects nga kanunay nga i-update aron mapakita ang mga bag-ong proyekto ug kalihokan.
Kung ang usa ka lugar anaa sa usa ka environmentally critical zone o adunay mga nag-unang katungod, ang DENR mahimong magtakda og dugang mga kondisyon o magdumili sa pag-access.
Matud sa DOE nga kaniadto, ang mga proyekto sa renewable energy nagkinahanglan ug lain-laing mga kasabutan sa pagsunod sa DENR sama sa foreshore lease, forest land use agreements, ug miscellaneous lease agreements, apan kini nga MOA naghatag ug awtoridad sa offshore wind energy service contracts nga magpadayon nga wala kining mga kasabutan.
Tungod niini, mas gipasayon ang proseso samtang gisiguro nga magpadayon gihapon ang proteksyon sa kalikupan.
Nagkanayon si Energy Secretary Raphael P.M. Lotilla nga kini nga MOA mahinungdanon alang sa pagkab-ot sa tumong ni Presidente Ferdinand Marcos Jr. sa paghimo sa unang kilowatt-hours gikan sa offshore wind projects sa 2028 pinaagi sa pagpahapsay sa pag-access sa mga importanteng lugar alang sa mas paspas ug mas responsable nga transisyon ngadto sa limpyo nga enerhiya. (BANAT NEWS)