CEBU, Philippines — Gibasura sa konseho sa dakbayan sa Sugbo ang resolusyon kalabot sa pagpahigayon og tulo ka adlaw nga kalihukan sa sabong sa usa ka dakong hotel sa South Road Properties human ang pipila ka mga konsehal misupak kay kalapasan kini sa balaod.
Kini nagumikan sa resolusyon nga gisang-at ni Konsehal Pastor "Jun" Alcover nga mangayo unta og pagtugot sa Konseho nga tugotan ang OX KBDF Gaming nga makapahigayon og sabong sa maong hotel.
Ang resolusyon naglatid sa Section 3 sa City Ordinance No. 1447 nga naila nga "An Ordinance Regulating the Operation of Cockpits in the City of Cebu" aron suportahan ang pagpahigayon og tulo ka adlaw nga promosyon karong Oktubre 2024 sa maong hotel.
Hinuon gimando usab niini nga aprobahan lang kini ubos sa mga lagda ug regulasyon nga gilatid sa maong ordinansa ug sa Cebu City Gamefowl Commission.
Ang maong resolusyon mabasa nga niadtong Septiyembre 12, 2024 giaprobahan sa Cebu City Gamefowl Commission nga nagrekomendar sa Konseho nga aprobahan ang maong sabong. Apan, atol sa diskusyon, pipila ka mga konsehal ang wala mobotar sama ni Konsehal Philip Zafra kinsa miingon nga iyang pag-abstain subay sa kasamtangang mga balaod ug ordinansa nga ang pagpahigayon og sabong mahimo lang sa duly-accredited cockpit arena.
Hinuon gipasabot ni Konsehal Joy Augustus Young, kinsa nipadayag usab sa iyang tinguha nga mag-abstain, nga kun supak kini sa balaod, angay silang mosupak sa resolusyon.
Sa laing bahin, si Konsehal Noel Wenceslao, Chairman sa Committee on Budget and Finance sa konseho sa dakbayan, niingon nga suportado niya ang resolusyon sanglit ang siyudad “in dire need” sa revenue.
Gibutyag ni Alcover nga P500,000 nga amusement tax ang nabayran sa unang duha ka derby nga gipahigayon sa maong dapit.
Dihang giduso ni Konsehal Mary Ann de Los Santos ang mosyon nga magbotasyon, mayoriya ang supak sa mosyon ni Alcover.
Pipila sa mga mibotar nga dili pabor mao sila si Konsehal Jocelyn Pesquera, Francis Esparis, Rhea Jacosalem, de los Santos, Young, Jose Lorenzo Abellanosa, Nestor Archival Sr., James Anthony Cuenco. — /IBM (BANAT NEWS)