CEBU, Philippines — Patay ang usa ka 14-anyos nga lalakeng tinun-an sa grade 9 human kini nalumos samtang nangaligo ilawom sa Suba Bridge, sa Barangay Poblacion, Lungsod sa Liloan, Biyernes sa buntag.
Ang namatay nagpuyo sa Barangay Cotcot sakop gihapon sa maong Lungsod. Sa imbestigasyon sa Liloan Police Station gikan nagduwa og basketball ang batan-on kauban ang mga barkada ug nidiretso og pangaligo sa ilawom sa maong taytayan.
Apan dihang nilayat kini gikan sa taytayan giingong nadala kini sa lilo sa tubig ug wala na makalutaw dayon hangtud nga nalumos. Ang Bantay Dagat Rescuers sa lungsod maoy mikuha sa iyang lawas ug gidala sa Danao City Hospital apan gideklarar kining dead-on-arrival. — /IBM (BANAT NEWS)