CEBU, Philippines — Miduso sa iyang Certificate of Candidacy (COC) ang sakop sa media nga si Chris Ligan alang sa pagka konsehal sa Lungsod sa Cordova sa sunod tuig nga eleksyon.
Nalakip siya sa line up ni kanhi Cordova Mayor Therese "Teche: Sitoy-Cho sa Partido Federal ng Pilpinas. Si Chris konektado karon sa My TV ug barangay konsehal sa Barangay Buagsong sa Lungsod sa Cordova.
Nakahukom siya sa pagsalmot sa piniliay tungod kay tinguha niya nga kaalagaran ang mga Cordovanhon ug lakip sa iyang plano ang paghatag og pagtagad sa housing program, panginabuhian ug ang kahapsay ug kalinaw.
Samtang subli nga mag-atbang sila si incumbent Cordova Mayor Cesar "Didoy" Suan ug kanhi Cordova Mayor Therese "Teche" Sitoy-Cho sa eleksyon sunod tuig.
Si Mayor Suan misang-at na sa iyang Certificate of Candidacy (COC) alang sa iyang ikaduhang termino ubos sa One Cebu Party ug Lakas CMD.
Kauban niya nga miduso og COC si Incumbent Vice Mayor Boyet Tago III ug mga magpapili nga sakop sa konseho nga nglakip nila ni Remar Baguio, Chito Bentazal, Lierra Casquejo, Dason Patric Lagon, Jerome Lepiten, Lemuel Pogoy, Natileigh Marie Therese Sitoy ug Jeseieneth Stephen Wahing.
Si kanhi Cordova Mayor Teche Sitoy-Cho ang mi-file sa iyang COC sa Comelec kagahapon, Domingo Oktubre 6, 2024 uban sa iyang tandem nga bise mayor nga si Atty Ronald Sitoy ingon man sa iyang line up.
Naglakip niini mao sila si kanhi Cordova Councilor Roque Yburan, Samuel Sumagang, Cynthia Cuarenta, Antowen Pogoy, Chris Ligan ug Jovelle Trangia.
Samtang si Atty. Jordan Pizarras niduso sa iyang Certificate of Candidacy niadtong Sabado isip 1st District Representative sa Probinsya sa Bohol ubos sa partido Aksyon Demokratiko.
Si Atty. Pizarras misaad nga magdala og transformative change sa distrito, partikular na sa marginalized sector.
Sumala pa ni Pizzara ang hustiya dili lang para sa mga datu apan para kini sa tanan bisan man og kabus. — /MEL (BANAT NEWS)