CEBU, Philippines — Ang Department of Social Welfare and Development Central Visayas (DSWD-7) nanawagan sa mga benepisyaryo sa Pantawid Pamilyang Pilipino Program (4Ps) nga adunay mabdos nga mga miyembro o mga bata nga nag-edad og dos paubos sa pag-update sa ilang profile.
Kini isip pagpangandam alang sa rollout sa First 1000 Days (F1KD) nga cash grant nga magsugod sunod tuig.
Ang conditional grant nagtinguha sa pagsulbad sa kakuwangan sa maternal ug child health, sama sa dili igo nga prenatal care ug nutritional deficiencies nga mahimong mosangpot sa hinay nga pagtubo sa mga bata.
Aron makabaton sa mga benepisyo niini, giawhag ang mga miyembro sa pag-update sa ilang impormasyon ug contact details ug mobisita sa 4Ps city/municipal links (C/MLs) nga gi-assign sa ilang lugar.
Kinahanglan usab nilang mosumiter og mga dokomento sama sa birth certificate sa bata ug health certificate sa mga mabdos nga miyembro nga giisyu sa ilang Rural Health Unit (RHU) o Barangay Health Station (BHS).
Matud ni DSWD-7 Director Shalaine Marie S. Lucero nga gisugdan na nila ang pagpakatap niining kasayuran ngadto sa ilang mga benepisyaryo sa miaging bulan.
Ang mga benepisyaryo sa 4Ps giawhag sa pagbisita sa ilang C/MLS sa dili pa ang Oktubre 20, 2024. — /MEL (BANAT NEWS)