Business Center gisugdan na og trabaho sa Dumanjug

CEBU, Philippines — Usa ka civic ug business center ang gisugdan na og tukod sa lungsod sa Dumanjug human sa gipahigayon nga groundbreaking niadtong Biyernes dungan sa selebrasyon sa kapistahan sa lungsod.

Ang maong center gipanganlan og Pablo P. Garcia Civic and Business Center nga nahimutang sa 27 ka ektarya nga propedad sa Barangay Tapon sa lungsod sa Dumanjug.

Si Mayor Efren Guntrano Gica nagkanayon nga angayan ra nga ipangalan ang maong struktura sa anhing gobernador nga lumad nga taga Dumanjug.

“It is just right and proper nga tagaan og pasidungog, honor ang atong former congressman, former governor nga taga Dumanjug” matud ni Gica.

Ang pamilyang Garcia gipangulohan ni gobernadora Gwendolyn ang mitambong sa maong groundbreaking niadtong Biyernes.

Suma pa ni Mayor Gica nga ang desinyo sa maong struktura replica sa Cebu Capitol Building sa dakbayan sa Sugbo.

Dili momenus tulo ka mga gobernador sa Probinsya sa Sugbo ang gikan sa lungsod sa Dumanjug. Una si kanhi gobernador Dionisio Jakosalem, si kanhi gobernador Pablo “Pabling” Garcia ug si gobernador Gwen Garcia.

Ang maong struktura gipaabot nga mahuman sulod sa kapin usa ka tuig.

Matud ni Gica kon kini mahuman, adto ibutang ang mga buhatan sa ilang munisipyo.

“Magbutang ta diha mga 5 hectares of the 27 (hectares) nga office gyud sa municipal agriculturist aron adto sila didto mag opisina unya mag butang didto og demo farm with all kinds of high value crops aron naay matan-aw ang atong farmers sa Dumanjug ug sa mga silingang lungsod. Pagbuhi og manok bisaya and other livestock” matud ni Gica.

Plano sa lungsod magbutang og sports facility sa maong dapit ingon man mixed-use building aron mapalambo ang ekonomiya sa lungsod.  (BANAT NEWS)