CEBU, Philippines — Ang Task Force Pabahay (TFP) sa kagamhanan sa Dakbayan sa Sugbo nihukom nga bawion ang luna sa Camp Marina sa Barangay Kalunasan.
Panahon pa ni kanhi mayor Eulogio Borres gidonar sa siyudad ang 4.3 ektaryag nga luna aron himuong sementeryo sa Evangelical Free Church.
Gisusi sa TFP ang giingong address sa Evangelical Free Church sa V. Rama Avenue, Dakbayan sa Sugbo apan walay nakaila niini diha sa maong lugar.
Matud ni Atty. Ronald Anthony Librando, executive director sa Division for the Welfare of the Urban Poor (DWUP) nga adunay narehistro sa Securities and Exchange Commission nga Evangelical Christian Coalition of Cebu, Inc. nga ang address 2241 V. Rama Avenue.
Apan pagsusi nila diha sa lugar walay nakaila o nahimutang nga building ubos sa ngalan sa Evangelical Christian Coalition of Cebu, Inc.diin Bible Baptist Church ang anaa sa lugar.
“Naa siya’y SEC registration. Pagtan-aw namo, ang iyang address 2241 V. Rama Avenue. So,among giadto. Pag-imbestigar namo, wa sila kaila, walay ing-ana nga grupo kuno didto nga address sa V. Rama (Avenue). So, dubious gyud ang personality”, matud ni Librando.
Si Librando nagkanayon nga kinahanglang bawion ang donasyon tungod kay walay na-record nga acceptance of donation ug nakalapas usab ang katuyoan sa donasyon nga tukoran og sementery ang luna sa zoning ordinance sa Siyudad sa Sugbo.
Kabahin ang luna sa Camp Marina Resettlement Area nga plano sa kagamhanan sa Dakbayan sa Sugbo nga tukoran og housing projects aron kapoy-an sa mga papahawaon unya gikan sa daplin sa mga sapa sa siyudad. (BANAT NEWS)