CEBU, Philippines — Niduso na sa ilang certificate of candidacy ang sakop sa Partido Barug ug Bag-ONG Sugbu sa COMELEC kagahapon, Oktubre 3, 2024.
Gipangulohan ang partido ni suspended Mayor Michael Rama kinsa subli nga magpapili isip mayor sa Dakbayan sa Sugbo.
Matud ni Rama nga tumong sa iyang paglansar mao ang pagpadayon sa iyang tinuoray nga pagpangalad.
Adunay nitumaw nga hungihong nga modagan sa samang posisyon si Konsehal Nestor Archival ug Acting Cebu City Mayor Raymond Alvin Garcia. Si Rama ug Garcia kaalyado kini sa piniliay niadtong 2022.
Sa piniliay karong 2025, si Acting Vice Mayor Donaldo Hontiveros ang modagan isip bise mayor ni Rama.
Sa pakighinabi sa Banat News, si Hontiveros nagkanayon nga magpabilin siya sa barko kuyog ni Mayor Rama.
Kabahin sa hungihong nga molansar kini pagka-mayor sa siyudad, matud ni Hontiveros nga wala nila kini mahisgoti apan kanunay siya nga team player.
Atol sa pormal nga pagduso sa certificate of candidacy sa Partido Barug ug Bag-ONG Sugbu gihinganlan na usab ni Rama ang mga konsehal sa amihanan ug habatagan nga distrito.
Sa amihanang distrito langkuban kini nila ni Rex Milan, Jessica Resch, Rey Lauron, Mae Ann Aguipo, Maria Pino, Andrew “Titing” Biton, Ernest Herrera, ug Konsehal Noel Wenceslao.
Lakip sa niduso sila si Ian Hassamal ug Kevin Sanchez apan wala sila naapil sa pagdeklara ni Rama atol sa opisyal nga mga kandidato ubos sa partido.
Sa habagatang distrito langkuban kini nila ni Novie Abella, Gremar Barete, Ramon Alcoseba, Konsehal Jocelyn Pesquera, Harry Eran, Konsehal Francis Esparis, Philip Zafra, ug Atty. Mikel Rama.
Alang sa pagka-kongresista, ang pangulo sa Bag-ONG Sugbu nga si Franklyn Ong ang molansar sa north district ug subling magpapili si Congressman Edu Rama sa south district.
Sa laing bahin, gihulagway sa Cebu City Police Office (CCPO) nga malinawon ang unang tulo ka adlaw nga filing sa COC) sa mga gustong magpapili sa sa umaabot nga midterm election sa sunod tuig. —Rowena D. Capistrano, Decemay P. Padilla (BANAT NEWS)