CEBU, Philippines — Gisuspenso ang face-to-face nga klase sa Sugbo niadtong Lunes, Septiyembre 30 alang sa inspeksyon sa mga school buildings ug uban pang mga imprastraktura human sa magnitude 5.1 nga linog nga niigo sa lungsod sa Poro sa Camotes Island niadtong Septiyembre 29.
Sa Cebu City, base sa memo nga gi-isyu ni Cebu City Schools Division Superintendent Dr. Nimfa Bongo, ang in-person classes sa elementarya ug sekondarya sa mga publiko ug pribadong tunghaan gisuspenso aron magtugot sa mga kinahanglanong inspeksyon aron masiguro ang kaluwasan sa mga estudyante ug staff.
Gimando nga ipaagi og Modular Distance Learning (MDL) ang mga klase aron di na sila moadto sa eskuylahan.
Gipahayag sa memorandum nga ang Division Engineer ug mga engineer sa Local School Board (LSB) maghimo og inspeksyon sa mga eskwelahan nga nahimutang sa downtown areas, labi na sa mga eskwelahan nga adunay mga high-rise buildings.
Samtang ang mga School Disaster Risk Reduction and Management (SDRRM) Coordinators magdumala sa mga inspeksyon sa mga eskwelahan nga nahimutang sa mga barangay sa bukirang dapit ug gimaduan sila sa pag-report dayon sa bisan unsang damage aron daling maaksyonan.
Pipila ka mga kolehiyo, lakip ang Cebu Normal University (CNU) ug tanang lebel ug kampus sa Asian College of Technology (ACT, nagsuspenso usab sa face-to-face classes.
Ang kagamhanan sa Dakbayan sa Lapu-Lapu ug ang Munisipalidad sa Cordova mimando usab sa pagsuspenso sa klase sa tanang lebel sa pampubliko ug pribadong tunghaan lakip na ang mga tinun-an sa kolehiyo sa Lapu-Lapu ug Cordova Public College aron mapadali ang inspeksyon ug assessment sa mga bilding sa eskwelahan ug uban pang imprastraktura.
Ang Munisipalidad sa Poro, nga maoy epicenter sa linog mipagawas usab og suspensiyon sa klase sa tanang lebel sa pribado ug publikong mga tunghaan.
Niadtong Domingo, Septiyembre 29, ang maong lungsod gitay-og magnitude 5.1 nga linog sa alas 2:53 sa hapon nga adunay lain-laing gikusgon nga nasinati sa tibuok Visayas, matod sa Philvolcs ug USGS.
Si Talisay City Engineer Arnel Bacalso miingon nga susihon sa City Engineering Office sa Talisay ang kalig-on o integridad sa mga pampublikong tunghaan ug pampublikong edipisyo alang sa pagsigurong luwas pa kining gamiton.
Samtang si Cebu City Acting Mayor Raymond Alvin Garcia mimando sa Office of the Building Official sa pagsusi sa mga structural integrity sa buildings ug mga structures sa Cebu City.
Si Garcia nidasig sa mga tawo nga motaho sa higayon nga adunay mga structural damage sa ilang area nga maoy hinungdan sa linog ngadto sa OBO sa City Hall. — Preciosa Bacalso, Rowena Capistrano, Gabriel Bonjoc, Le Phyllis Antojado (BANAT NEWS)