Cleft Care Center sa CCMC andam na pagdawat og mga pasyente

CEBU, Philippines — Andam na ang Cebu City Medical Center (CCMC) nga modawat og mga pasyente alang sa operasyon sa mga dunay deperensya sa baba human sa soft launch sa "Cebu Comprehensive Cleft Care Center of Excellence" nga gidumala sa Operation Smile Philippines (OSP) niadtong Sabado, September 28, 2024.

Ang Cebu Comprehensive Cleft Care Center of Excellence nga usa ka 2,000 sqm nga modernong pasilidad nagtumong sa paghatag og libreng operasyon matag tuig sa mga bata ug indibidwal nga kabus nga adunay cleft lip, palate, ug uban pang deformation sa nawong dili lamang sa rehiyon apan sa tibuok kalibutan.

Gawas sa operasyon, ang sentro magtanyag usab og komprehensibo og libreng mga pag-atiman, lakip ang mga dietary consultation o nutrition program, dental services, ug psychological care.

Ang pasilidad nga nahimutang sa ikapitong andana sa CCMC, adunay 20 ka pre-operative beds, 20 ka post-operative beds, 5 ka advanced operating rooms, 6 ka post-anesthesia beds, 2 ka dental chairs, 4 ka consultation rooms, 1 ka speech therapy room, 1 ka psychosocial care room, ug 1 ka dagkong medical education room.

Si acting Cebu City Mayor Raymond Alvin Garcia nipadayag sa iyang pagpasalamat ug nipasigarbo sa world-class nga pasilidad, nga kung full operation na, mahimong labing dako sa tibuok kalibutan nga naghatag sa samang serbisyo.

Gipahibawo usab ni Garcia ang hiniusang paningkamot sa pagkompleto sa pasilidad, nga matud niya, bisan pa sa mga hagit, ang regular nga mga miting nakatabang sa pagsulbad sa mga isyu ug pagduso sa proyekto.

Sa laing bahin, si Mariquita Salimbangon-Yeung sa MSY Charitable Foundation, nga usa ka philanthropist ug negosyante, uban sa suporta sa gatusan ka mga donor, malampusong nakapatukod sa sentro aron matabangan ang mga bata nga adunay cleft lip ug palate kun mga bungi sa pagbag-o sa ilang kinabuhi alang sa mas hayag nga kaugmaon.

Ang grand opening sa center gikatakda sa buwan sa Nobiyembre, nga matud sa OSP, modawat sila og 100 ka mga pasyente nga nag-edad unom ka buwan hangtud 51 anyos gikan sa 12 ka local government units (LGU) sa Cebu.

Kini nga mga pasyente naggikan sa Cebu City, Minglanilla, Siyudad sa Naga, Compostela, Danao City, Mandaue City, Bogo City, San Remegio, Daanbantayan, Medellin, Lapu-Lapu City, ug San Francisco, Camotes Island.

Gipunting ni Kevin Thor, Director sa Global Project Development sa Operation Smile, nga kini pa lang ang sinugdanan sa ilang plano nga makigpartner sa matag LGU sa Probinsya sa Sugbo ug uban pang mga organisasyon aron maabot ang matag pamilya.

Sa sunod nga mga buwan, ang cleft care center nagtinguha nga maka-serbisyo sa 160 ka mga pasyente matag bulan ug hangtod sa 2,000 ka mga pasyente matag tuig pinaagi sa ilang mga serbisyo sa pag-atiman. — /MEL (BANAT NEWS)