CEBU, Philippines — Gipirmahan ni Department of Education (DepEd) Secretary Sonny Angara ang bag-ong mga giya alang sa pagdugang sa vacation service credits (VSCs) sa mga magtutudlo sa pampublikong tunghaan gikan sa 15 ngadto sa 30 ka adlaw.
Base sa DepEd Order No. 13, s. 2024, kini nga bag-ong mga giya nagpahapsay sa administrasyon sa vacation credits nga nagtugot sa mga magtutudlo sa pag-offset sa mga pag-absent tungod sa sakit o personal nga mga rason, o sa pag-recover sa mga deductions sa sweldo sa panahon sa bakasyon.
Ang giusab nga kamanduan naghatag og katungod sa mga incumbent nga magtutudlo nga adunay labing menos usa ka tuig nga serbisyo, ingon man ang mga bag-ong gi-hire nga magtutudlo nga gitudlo sulod sa upat ka bulan pagkahuman sa pagsugod sa mga klase, sa 30 ka adlaw nga VSC matag tuig.
Dugang pa, ang mga bag-ong gi-hire nga magtutudlo kansang appointment gihatag upat ka bulan pagkahuman sa pagsugod sa klase makadawat og 45 ka adlaw nga VSC matag tuig.
Usa usab sa mahinungdanong kausaban mao ang probisyon sa pagkwenta sa service credits nga molapas sa regular nga mga oras sa trabaho.
Ang mga magtutudlo makakuha na og 1.25 ka oras nga VSC alang sa matag oras sa kwalipikadong serbisyo nga gihimo sa mga adlaw sa klase. Kung ang serbisyo gihimo atol sa mga bakasyon, katapusan sa semana, o mga holiday, ang matag oras katumbas sa 1.5 ka oras nga VCS.
Gawas niana, makabenepisyo usab ang mga magtutudlo nga nakaserbisyo og mga ancillary tasks o dugang mga katungdanan nga may kalabutan sa pagtudlo gawas sa ilang regular nga oras sama sa pag-attend sa mga training sessions sa weekends o holiday, pagdumala sa mga remedial o enhancement classes, mga katungdanan nga may kalabutan sa eleksyon, mga parent-teacher conferences, ug home visits.
Kung ang teaching overload dili mabayaran pinaagi sa overload pay, ang mga magtutudlo makadawat og 1.25 ka oras nga VSC alang sa matag oras sa dugang nga pagtudlo, gawas sa ilang 30 ka adlaw.
Ang pag-apruba sa VSCs magkinahanglan og awtorisasyon gikan sa Schools Division Superintendent o sa laing gitudlo nga awtoridad. — /MEL (BANAT NEWS)