‘Marites’ nga tulisan

CEBU, Philippines — Nakabsan sa kinabuhi ang 19-anyos nga tinun-an human kini gipusil sa duha ka tulisan diha sa  Sitio Asupha, Alumnus, Barangay Basak San Nicolas, siyudad sa Sugbo alas-10 sa gabii niadtong adlaw'ng Biyernes, Septiyembre 27, 2024.

Gidemalas lang ang usa sa mga tulisan kay nag “Marites” ug nibalik sa crime scene ug didto nadakpan.

Ang biktima mao si John Lloyd Delos Reyes Bejec, 19, taga Lungsod sa Dalaguete ug temporaryo nga nag-abang sa maong dapit ug tinun-an sa first year sa usa ka maritime school sa maong dapit.

Usa ka Bryan Fernandez, 24, residente sa Sitio Tabay, Alumnos, Barangay Basak San Nicolas ning siyudad ang gidakop human positibong giila sa testigo.

Si Police Lieutenant Lyndon Mondragon, Deputy Chief sa Mambaling Police Station 11 sa Cebu City Police Office , nagkuyog ang biktima ug sa iyahang uyab adtong higayona diha sa maong dapit.

Apan gitulis sila og duha ka tawo. Apan wala pa gyud matagbaw ang duha ka tulisan kay human nakuha ang mga butang gipusil pa gyud sa ulo ang biktima.

Ang uyab sa biktima nakahatag sa diskripsyon sa mga tulisan.

Matud pa sa mga polis atol sa pagsukit-sukit nila diha sa crime scene dunay usa ka lalaking nagbisekleta nga nisagol sa mga nanguryoso nga nitakdo gyud sa paghulagway sa uyab sa biktima.

Ang suspek, nakauli na diay sa ilaha ug nanghuwam og bisekleta aron mobalik sa crime scene aron kunohay manguryoso.

"That time doon sa crowd parang naki-usyuso pa siya, parang tactics niya ba na humalo siya sa crowd para hindi siya mapagdudahan," sigon ni Mondragon.

Ang itsura ug gisuot sa suspek nihaom sa deskripsyon nga gihatag sa uyab sa biktima hinungdan ila kining giduol.

Sa dihang gipakita siya ngadto sa uyab sa biktima, positibo niya kining giila ug gitudlo nga maoy nitulis ug nagpusil sa iyang uyab.

Sa pakighinabi sa Banat News sa suspek iyang giangkon nga siya'y nagpusil sa biktima kay matud pa niaksyon kini og sukol ug tungod sa iyang kakurat napusilan niya kini sa ulo.

Kwarta ug cellphone ra sab ang iyahang gikinahanglan atong higayona.

"Ako unta i- kuan sa amoa bugas, tapak-tapak, para amoa," sigon sa suspek.

Human sa pag-angkon sa krimen gitug-an sab niya sa kapulisan kun asa niya gibilin ang kalibre .45 nga armas nga gigamit niya sa pagpusil ingon man ang cellphone sa biktima nga iyang natulis.

Wala pa mahuman ang imbestigasyon sanglit sutaon nila kun asa nakakuha og armas ang suspek apil na ang pagpangita sa kauban niini. Ang suspek nadakpan na sa miaging tuig tungod sa drugas  apan nakagawas.

Kasong robbery with homicide ug kalapasan sa Republic Act 10591 ang ipasaka baton sa suspetsado.

Si Konsehal Rey Gealon sa Dakbayan sa Sugbo ug kasamtangan nga pangulo sa South Road Properties Board nipadangat sa ilang pahasubo sa nagbangutan nga pamilya sa namatay nga tinun-an. Giawhag niya ang kapolisan nga himuong prayoridad ang pagsikop sa gawasnong kauban sa pagpanulis.

"Angayan usab mag double-time ang kapulisan sa pagpakgang sa naghitak nga kriminalidad nga nanghitabo sa siyudad sama sa patay, tulis, kawat, lungkab, kuot, labni, bodul, taliwala sa gubat sa drugas, mao untay unahon sa paggukod - dili kay "sabong sa kaka" maoy pokusan nga kampanya kay pwede ra gyud intawn na siya mauwahi," dugang pa ni Gealon.

Isip chairman sa SRP board tinguha ni Gealon nga himuon ang dinaliang paghawan sa kalibonan sa SRP nga diin pwedeng adto magpahipi ang mga tulisan.—  Rowena D. Capistrano/IBM BANAT NEWS