CEBU, Philippines — Gibalhog sa prisuhan ang usa ka Sangguniang Kabataan(SK) Chairman sa usa sa mga barangay sa Lungsod sa Tuburan human gipasanginlang iyahang gikawatan og kwarta ang usa sa mga staff sa Office of the Mayor sa maong lungsod niadtong Huwebes sa hapon, Septiyembre 26, 2024.
Ang suspetsado mao si alyas John, 21 anyos, SK Chairman ug residente sa maong lungsod. Samtang ang biktima mao ang Executive Assistant sa Office of the Mayor nga si Steve Cesar Salipot, 48 anyos ug taga Barangay Inayawan, siyudad sa Sugbo.
Nagkanayon si Police Lieutenant Colonel Glenn Hife, ang hepe sa Tuburan Police Station nga ang SK Chairman nibisita niadtong Huwebes sa hapon sa Office of the Mayor.
Apan kay pasado alas 5 na wala na'y mga empleyado gawas lang sa biktima nga executive assistant. Nag-estoryahanay matud pa ang duha apan nigawas ang biktima kay dunay giadto.
Nakit-an matod pa sa suspek ang bag sa biktima ibabaw sa lamesa niini hinungdan iyang gihilabtan ang bag ug gikuha ang kwarta sulod sa bag nga P35,000.
Nahibaw-an nga ang suspek maoy nagkuha sa kwarta dihang gi-review ang CCTV footage.
Ang rason matud pa sa suspek natintal ra siya kay giingong duna siya'y problema sa iyahang pamilya ug naa sab siya'y gustong paliton nga dili niya mapalit.
"Pagkita niya sa bag naay kwarta iyaha kunong gihilabtan, mao rapuy rason niya... Wala sad siya nagsulti nagbisyo siya ana nga duwa (scatter) or nag adik-adik siya," sigon ni Hife.
Sa P35,000 nga kwarta nga nakuha kapin P3, 000 nalang ang na recover sa kapulisan.
Matud pa gigamit na sa suspek ang kwarta sa pagpamalit og butang ug giingong duna sad kini tawong gipad-an og kwarta nga wala niini gibutyag.
Nasayran nga unang termino pa suspect isip SK Chairman sa ilang barangay. Desidido mopasaka og kasong pagpangawat ang biktima. -- IBM BANAT NEWS