CHR misusi sa pagpatay sa Brgy Kagawad sa Bogo City

CEBU, Philippines — Nagpadala ang Commission on Human Rights (CHR) og Quick Response Operation (QRO) team aron imbestigahan ang pagpatay sa Barangay Kagawad sa Barangay Cogon, Bogo City, Cebu nga si Antonio Harry Godinez niadtong Septiyembre 7, 2024.

Sa usa ka pamahayag, gipadayag sa CHR nga gikinahanglan ang dinalian ug mahukmanong aksyon tungod sa nagkadaghang mga opisyal sa barangay ug ubang opisyal sa gobyerno nga gipamatay sa niaging mga buwan.

Matud pa sa buhatan nga nagpahuyang kini sa demokrasya pinaagi sa pagpadako sa kahadlok ug kakulang sa seguridad sa mga konstituwente, nga nagpugong sa ilang katakus sa paghimo og gawasnon ug maalamon nga mga desisyon.

Gihatagan og gibug-aton sa CHR nga katungdanan sa tanang mga hingtungdan nga ahensya sa gobyerno ang magpatuman sa mga preventive nga mga lakang ug magpabilin nga alerto sa pag-atubang niining mga isyu. Kahinumdoman nga si Barangay Cogon Kagawad Godinez, gipusil sa wa pa mailhing mga tawo samtang nagsakay sa iyang motorsiklo paingon nga mouli.

Nakaangkon ang biktima og di mominos unom ka samad pinusilan sa lain-laing parte sa lawas ug gideklarang dead on arrival sa tambalanan.

Sumala sa kapolisan sa Bogo City ang mga suspek daling niikyas sa maong dapit nga nagbaktas.

Giawhag sa CHR ang lokal nga mga awtoridad sa paspas nga imbestigasyon samtang nagpadayon usab sila sa ilang kaugalingon nga imbestigasyon aron manubag ang mga responsable sa krimen ug pagsiguro sa kaluwasan sa komunidad ug pagsuporta sa tawhanong katungod. — MEL BANAT NEWS