CEBU, Philippines — Ang Department of Information and Technology (DICT) Cybercrime Investigation and Coordinating Center (CICC) nangita karon og teknolohiya nga maka-detect ug makasanta aning deepfakes diha sa social media o sa internet. Matud pa ni CICC director Alexander Ramos Alexander Ramos, ang deepfake dako kaayong hulga sa tanan ilabi na karong nagsingabot na sab ang eleksyon.
Kining deepfake usa ka matang sa teknolohiya nga artificial intelligence (AI) nga kayang mohimo ug manipulahon ang mga hulagway, videos, tingog sa tinuod nga tawo. Si Presidente Ferdinand Marcos Jr. nabiktima na niini sa makadaghang higayon nga diin gustong ipakita sa mga naghimo siya og dautan,ilegal o sayop sa iyang mga gipamahayag.
Matud pa ni Ramos ilaha kini karong gitutokan tungod nakita nila nga usa kini ka pamaagi nga pang-ilad sa publiko ilabi na sa mga netizens tungod kay ang pagkahimo mura gyud og tinuod sa mga makakita o makatan-aw.
“So, nandoon tayo, paano madi-detect nitong mga platforms na ito na kung ang content ay hindi original? So, iyan ang ating mga inaabangan na teknolohiya,” puno pa niya.
Nakigalayon sab sila karon sa Commission on Elections (COMELEC) aron pagpangita niini nga matang sa teknolohiya aron mamentinar ang integridad sa umaabot nga eleksyon. Dinhi sa Sugbu, bisan ang pinakataas nga opisyal sa simbahan nga si Archbishop Jose Palma, nabiktima sab niining deepfakes sa dihang gigamit ang iyang hulagway ug video diha sa social media nga nag-alegar nga siya miendorsar og produktong medikal. (BANAT NEWS)