CEBU, Philippines — Imbes sa tambalanan ang padulngan sa usa ka lalake human madisgrasya diretso hinoon kini sa prisuhan kini tungod kay adunay nakuhang mga gagmay’ng paketeng gituohang shabu diha sa lugar diin siya nadisgrasya samtang nagmaneho sa iyang motorsiklo sa National Highway sa Barangay Tinaan, dakbayan sa Naga sa miaging adlaw.
Ang gidakop mao si Jessie Boy Sabellano, residente sa Sitio Laguna, Barangay Bulacao, siyudad sa Sugbo. Sa impormasyon sa Naga City Police Station ang suspect sakay sa Yamaha NMAX nga motorsiklo adunay karga nga bisekleta padung sa amihanan.
Pag-abot sa naasoy nga dapit gikataho nga nabitik ang gikarga niining bike sa tubo diha sa kilid sa dalan hinungdan nga nabaliwliw siya sa dalan ug naangol.
Apan sa pagresponde sa mga polis sa nahitaboan adunay nakitang nagpasad nga mga gagmay'ng pakete sa gituohang shabu ug tooter diha sa dalan diin siya nasukarap hinungdan nga siya gidakop.
Sa pikas bahin, nadakpan sa mga operatiba sa Inayawan Police Station 7 sa Cebu City Police Office(CCPO) ang usa ka 38-anyos nga lalake nga high value individual atol sa ilang buy-bust operation sa Sitio San Vicente, Barangay Bulacao, siyudad sa Sugbo.
Ang suspetsado mao si Richie Rosales Recuerdo nga residente sa naasoy nga dapit. Nakuhaan ang suspetsado og 45.24 grams sa gituohang shabu nga nagkantidad og P307,632.
Apan gawas niini, nasakmitan sab siya og usa ka kalibre. 357 nga dunay upat ka bala. Usa ka semana nga gipaubos sa monitoring ang suspek ug nahibaw-an nga maka dispose kini og 100 ngadto sa 200 grams sa gituohang shabu diin ang area of operation niini kay Barangay Bulacao.
Kasong kalapasan sa Section 5 ug 11, Article II sa Republic Act 9165 ang ipasaka batok sa suspetsado. (BANAT NEWS)