CEBU, Philippines — Naangol ang usa ka 22-anyos nga delivery boy human kini gidunggab sa iyahang kainom nga menor de edad kinsa iyaha ra usab nga higala, insidente nahitabo diha sa Barangay Suba, Dakbayan sa Danao sa niaging adlaw.
Ang biktima mao si alyas “Teter”, residente sa naasoy nga dapit.
Base sa imbestigasyon sa Danao City Police Station nga ang biktima ug suspetsado nag-inom pagka-alas 3:00 sa hapon niadtong Lunes ug nahuman sa ilang inom pasado alas 4:00 na sa kadlawon niadtong Martes.
Ang duha kinsa pareho nang hubog giingong nagkalalis kini sa wala matino nga hinungdan.
Gibuak sa suspetsado ang botilya ug gidunggab niini ang walang bukton sa biktima.
"Didto gyud iyahang target sa left arm", matud ni Police Lieutenant Colonel Ike Arriola, hepe sa Danao City Police Station.
Matud ni Arriola nga suod nga amigo ang biktima ug suspek apan gumikan sa kahubog sa duha nahitabo ang maong krimen. Ang biktima nipadayag sa kapolisan nga dili na mosangt-at og kaso batok sa suspect kinsa gitugyan ngadto sa Department of Social Welfare and Development (DSWD). (BANAT NEWS)