Biyahe sa mga barko sa amihanan gikanselar

CEBU, Philippines — Pipila sa mga byahe sa Jomalia Shipping ang gikanselar kagahapong adlawa tungod sa dili maayong dagan sa panahon tungod sa bagyong dunay international nam nga Bebinca nga nisulod sa Philippine Area of Responsibility (PAR) kagahapon sa alas-6 sa gabii ug gitawag na nga Ferdie.

Apil sa gikanselar nga mga biyahe ang Danao-Consuelo, Camotes Island ug vice versa (VV); Olango-Engaño (VV), ug Hagutapay-Pilar-Ormoc (VV).

Ang maong mga byahe magpabiling kanselado hangtod sa laing notisya nga ipagawas sa kompaniya. Samtang ang Coast Guard mihimo usab og pahinumdom sa mga mananagat sa panahon nga adunay ulan o bagyo.

Miabiso sab ang Coast Guard sa mga mananagat nga kanunay maminaw ug motan-aw og balita sa radio ug TV sa dili pa managat; kun dili maayo ang panahon, dili lang gyud mosuway panagat aron paglikay sa disgrasya; siguraduhon nga maayo ang makina ug katig sa bangko sa dili pa managat; magdala og igong gidaghanon sa life jackets, flashlights, baterya ug pito atol sa panagat.

 Sa Cebu City, bisan og dili motugpa ang bagyong Ferdie sa kayutaan, gipanglantawan nga makamugna kini og pagbaha ug pagdahili sa yuta tungod sa dala nga uwan.

Tungod niini, gimandoan ni acting Mayor Raymond Alvin Garcia ang Cebu City Disaster Risk Reduction Management Office nga higpitan ang monitoring sa mga dapit nga peligro sa baha ug pagdahili sa yuta.

Niadtong pag-igo sa bagyong Enting adunay duha ka mga tawo ang natumpagan og paril sa managlahi nga dapit sa siyudad nga nisangpot sa ilang kamatayon.—  Rowena D. Capistrano/IBM BANAT NEWS