CEBU, Philippines — Gihandum kagahapon ang ika-146 nga kasumaran sa adlawng natawhan sa Grand Old Man of Cebu, Sergio Osmenña Sr.
Usa ka hamubo nga programa ang gipahigayon sa Osmenña Boulevard nga gitambongan sa mga opisyal sa Dakbayan sa Sugbo ug mga sakop sa Osmeña Clan.
Atol sa programa ang mga sakop sa PNP ug AFP nihimo og gun salute dayon ang paghalad og buwak sa marker nga nahimutang sa intersection sa Lapu-lapu Street ug Osmenña Boulevard.
Nasayran nga gideklarar nga non-working holiday ang September 9 isip pag-ila sa ikaupat nga presidente sa nasud.
Matud pa ni Acting Vice Mayor Donaldo "Dondon" Hontiveros, angayan nga tamdan sa mga nagtrabaho sa gobiyerno ang hiyas ni Osmeña nga dunay integridad, unity ug passion sa pagserbisyo sa katawhan.
Ang usa sa mga apo ni Osmenña nga si Jose Antonio Osmenña, mapasalamaton sa tanan nga nitambong ug nihatag sa pagyukbo sa ilang apohan lakip ang paghatag og 21 gun salutes.
Dugang pa ni Osmenña, kung magkahiusa lang ang tanan kini maoy yawe para sa paghatag og kasulbaran sa mga problema nga padayon gihapon nasugatan karon. Gitataw ni Osmenña, aron makab-ot ang kahiusahan kinahanglan maningkamot ang tanan sa pagpadaplin sa kaugalingon nga interest ug ipalabaw ang interest sa kadaghanan ug respetohon ang matag usa nga desisyon. (BANAT NEWS)