CEBU, Philippines — Nasakmit sa mga operatiba sa Philippine Drug Enforcement Agency (PDEA)-7, Naval Forces Central, Mandaue City Police Office Drug Enforcement Unit ug Police Regional Office(PRO)-7 Drug Enforcement Unit ang duha ka kilong gituohang shabu gikan sa usa ka 17-anyos atol sa ilang buy-bust operation sa Sitio Aroma, Barangay Subangdaku, dakbayan sa Mandaue kagahapon sa alas 2 sa hapon.
Nadakpan sa mga otoridad ang batan-on nga lumad nga taga Lungsod sa Ubay, Probinsya sa Bohol. Nakuha gikan kaniya ang lima ka putos nga gituohang shabu nga nitimbang og duha ka kilo nga nagkantidad og P13.6 milyones, buy-bust money ug ubang non-drug evidence.
Sumala pa sa PDEA-7 tulo ka semana nilang gipanid-an ang suspek hangtud nga gilusad kagahapon ang operasyon. Nasuta sab nga maka dispose og 1 kilo ang bag-ong identify nga suspect kada semana.
Kasong kalapasan sa Section 5 ug 11, Article II sa Republic Act 9165 ang ipasaka batok sa suspetsado.—IBM BANAT NEWS