CEBU, Philippines — Ablihan pagbalik sa Kagamhanan sa Dakbayan sa Sugbo ang Cebu City Quarantine Center sa North Reclamation Area aron maoy himoon nga isolation facility kun adunay matakboyan o kompirmadong kaso sa monkey pox o Mpox.
Ang CCQC maoy gigamit nga isolation facility sa panahon sa COVID-19 ug nagsilbi nga temporaryo nga butangan sa mga nataptan maong sakit.
Ug karon nga adunay natala nga kaso sa monkeypox sa nasud, ang kagamhanan nakahukom nga ablihan ang CCQC aron didto ipahiluna ang mataptan niini.
Wala pa hinuoy natalang kaso sa Mpox dinhi sa syudad apan agi og pangandam gimugna ni Cebu City acting Mayor Alvin Garcia ang inter-department task force agi og panagana.
Suma pa ni City Health Officer Dra. Daisy Villa nga ipatuman sa task force ang mga gihimo panahon sa pandemya sama sa pag-awhag sa katawhan nga manghugas og kamot, kanunay nga mag-disinfect ug magsul-ob og face mask aron nga dili mokatap ang Mpox.
“Close contact includes skin-to-skin and mouth-to-mouth or mouth-to-skin contact, and it can also include being face-to-face with someone who has Mpox,”matud pang Villa.
Ang mga simtomas makita sulod sa tulo ngadto sa 17 ka adlaw sama sa rashes, enlarged lymph nodes, hilanat, panakit sa ulo, sakit sa kaunuran, sakit sa likod ug kanunay nga pagluya sa lawas. Kun makasinati sa maong mga simtomas, pahimangno ni Villa nga likayan ang self-medication ug mo-konsulta dayon og doktor.— IBM BANAT NEWS