Bukirang bry sa siyudad makabaton na og tubig gikan sa MCWD

CEBU, Philippines — Gipahigayon ang groundbreaking ceremony sa MCWD Expansion Project sa bukirang bahin sa Barangay Guba ug Barangay Agsungot kagahapon, Septiyembre 2, 2024.

Kini gitambongan ni acting Cebu City Mayor Raymond Alvin Garcia, MCWD Chairman of the Board, Lawyer Joey Daluz III ug ubang miyembro sa board.

Kahinumduman nga kapin sa tuig nga walay nahitabo nga pipe laying human wala mahatagi og excavation permit niadtong tuig 2023.

Karon nga giaprubahan ni Garcia ang excavation permit, 9 ka lugar ug libuan ka mga residente sa bukid ang makabenepisyo sa maong kalambuan.

Isunod pagmuntar ang pipes ug water lines sa Barangay Binaliw, Barangay Cambinocot ug Barangay Busay.

Gihangop og gikalipay ni Garcia ingon man sa mga residente sa bukirang barangay ang maong kalambuan tungod kay makabaton na unya sila og limpyo nga tubig gikan sa Metropolitan Cebu Water District.

Sumala pa ni Garcia, ang mga residente magkuha ra gayud ug tubig ngadto sa ilang mga tubod apan karon sa proyekto sa MCWD makapataud na sila og tubig lahos sa ilang mga panimay.

“For the first time in the history nila, pila na sila ka tuig namuyo dira, makakuha na silag direct access from MCWD, ang pipes directly to their homes,” segun pa ni Garcia.

Dugang pa ni Garcia, ang maong proyekto makabenipisyo sa dili mominos 5mil ka mga pamilya.

Samtang sa laing bahin gipahibawo ni Garcia nga adunay duha ka mga board sa MCWD ang posibleng hulipan tungod kay giingong wala na kini tambong-tambong sa ilang tigum.

Hinuon si Garcia wala pay pangan sa posibleng ihulip nga molingkod sa board sa MCWD. (BANAT NEWS)