Mga sugbuanong artista gipasidunggan sa siyudad

CEBU, Philippines — Gipasidunggan sa Dakbayan sa Sugbo ang mga Sugbuanon nga mga artista gikan sa nagkadaiyang natad pinaagi sa Sugboanong Bahandi Awards.

Sa nahitabong awarding ceremony sa Waterfront Hotel and Casino niadtong Agosto 27, 2024 gisaysay ni acting Cebu City mayor Raymond Alvin Garcia nga daghan og kalihukan ang nahitabo karong buwan sa Agosto sama sa Pasigarbo sa Sugbo lakip na sab ang pagpahigayon sa ikaduhang hugna sa Cebu City Arts Month diin gisaulog niini ang mga produkto, kabilin, ug kultura nga gipakita pinaagi sa artistry ug artform.

Ang mga gipasidunggang awardees nagpakita dili lamang sa ilang talento apan usab sa ilang talagsaon nga pasalig ug dedikasyon sa pagpahait sa ilang kahanas. Dili lamang sila ang labing maayo sa ilang gibuhat apan nagdasig sila sa mga mosunod nga henerasyon.

“As we revel in the beauty of their artistry, may we also be reminded of the importance of preserving and promoting arts and culture in general and of our responsibility to pass on these treasures to future generations and to instill in them a sense of pride in being Cebuano from Cebu City”, mensahe pa ni Garcia.

Ang mga gipasidunggan mao sila si Celso Pepito (Visual Arts), Philip Rodriguez (Fashion), Orlando Magno (Performing Arts), Maria Theresa Magdalena Abellare Llamedo Cruzata nga mas ilado isip Dulce (Music), Pilar Pilapil (Music), ug Ingrid Sala Santamaria (Music).

Sa laing bahin, plano sab ni Garcia nga magpatukod og cultural center sa syudad aron mahatagan og luna ang mga lokal nga mga artista nga buot mopasundayag sa ilang katakus.  Matud pa ni Garcia nga natuki na kini sa planning office. Nagmalaumon sab siya nga makakita nga adunay mosulod nga mga business establishments ug mo-imbitar sab og mga local investors aron nga mapatuman ang maong gipanglantawan nga kalambuan sa syudad. — /MEL (BANAT NEWS)